ОХУ, Өмнөд Солонгос эвийн гэрээ байгуулав

ОХУ-Александр Кержаков-1 /74 дэх минут/
Дэлхийн аваргын сүүлийн хэсэг “H” хэсгийн нөгөө тоглолт нь ОХУ, БНСУ-ын багуудын тоглолт байв. Бразильд болж буй 2014 оны хөлбөмбөгийн дэлхийн аварга шалгаруулах тэмцээний нээлтийн тоглолтоо хийсэн ОХУ, БНСУ-ын багууд 1:1-ийн харьцаагаар эвийн гэрээ байгуулж, оноо хуваалаа. Хүч, чансааны хувьд ойролцоо энэ хоёр багийн аль аль нь бие биеийгээ хожих чадвартай. Тиймээс аль нэг баг нь нөгөө багаа олон гоолын зөрүүтэй хожно гэдэгт цөөхөн хүн л итгэж байв. Хоёр баг бие биеэ чиглэсэн довтолгоог ээлж дараалан хийж байсан боловч тоглолтын эхний хагасын 45 минутад “юу ч болсонгүй”. Харин хоёр дахь хагас эхлээд 23 минут болж байхад Өмнөд Солонгосын багаас Ли Гын Хо тооны харьцааг нээж манай хөршийн багийн 1:0-ийн харьцаагаар хошуучилж эхэлсэн.

Тэгвэл энэ давамгайлал тийм ч удаан үргэлжлэх хувьгүй байж. Эхний гоол орсноос зурган минутын дараа буюу тоглолтын 74 дэх минутад Оросын багаас Александр Кержаков гоолдож тооны харьцааг тэнцүүлэх багаа хожигдлоос аврав. Оросын багийн дэлхийн шилдэг дасгалжуулагчдын нэг, Итали мэргэжилтэн Фабио Капелло удирдаж энэ удаагийн дэлхийн аваргад оролцуулж буй.

Тиймээс ОХУ-ын баг тамирчид өндөр амжилт үзүүлэх боломжтой. Харин Ази тивийн шилдэг баг Өмнөд Солонгосын багийн хувьд өмнө нь хэд хэдэн удаагийн дэлхийн аваргад оролцож үзсэн туршлагатай. Энэ удаагийн тоглолтод Оросын шигшээгийн дасгалжуулагч Фабио Капелло 2012 оны Европын аваргад гялалзсан багийн лидерүүдийн нэг Алан Загоевийг гараанд гаргаагүйгээс гадна гарааны тоглогч Игорь Денисовыг сэлгээнд үлдээсэн юм. Харин 2002 оны дэлхийн аваргаар өндөр амжилт үзүүлсэн Өмнөд Солонгосын шилдэг бүрэлдэхүүний ахлагч Хон Мюн Бо энэ удаад улсынхаа багийг дасгалжуулж, “Арсенал”-д данстай явсан Пак Чу Ионгийг гараанд гаргаж, “Свонси Сити”-гийн Ки Сьюн Иунг, “Байер Леверкузен”-ий Сон Хьюн Мин тэргүүтэй тоглогчдоор дэмжүүлэв.

Гэсэн ч тоглолтын эхний үед Өмнөд Солонгос ч тэр ОХУ-ын баг тамирчид ч тэр төдийлөн аюултай довтолгоо хийж чадахгүй байв. Учир нь хоёр багийн аль алиных нь хамгаалалт нягт байж, алсын цохилтоос өөр хаалгыг чиглэсэн цохилт хийлгэхгүй байв. Тэгвэл хоёрдугаар үе эхлээд ялимгүй давуу тоглолт үзүүлсэн Өмнөд Солонгосын баг энэ тоглолтынхоо ачаар тооны харьцааг нээсэн. Нөгөөтэйгүүр Өмнөд Солонгосын оны шилдэг хөлбөмбөгчин Сон Хьюн Мин хэд хэдэн боломжоо алдсан. Харин Ко Жа Чол болон Ки Сьюн Иунг нарын цохилтыг Оросын хаалгач Игорь Акинфеев амжилттай хаагаад байв. Улмаар талбайд сэлгээгээр орж ирсэн Ли Гын Хо 68 дахь минутанд сөрөг довтолгоо эхлүүлж цохилт гүйцэтгэхэд Оросын хаалгач И.Акинфеев уучилж боломгүй алдаа гарган бөмбөгөө алдаж гоол алдсан юм.

Шууд барьж авч болох байсан бөмбөгийг хаалга руу алдсан нь ийм туршлагатай хаалгачаас гарамгүй алдаа байв. Гэсэн ч Ф.Капеллогийн хийсэн хоёр сэлгээ тоглолтын үр дүнг эргүүлж тооны харьцааг тэнцүүлсэн юм. Тодруулбал, сэлгээгээр орж ирсэн Алан Загоевийн цохисон бөмбөгийг мөн л сэлгээгээр орж ирсэн Александр Кержаков гүйцээж, гоол оруулсан. Өөрөөр хэлбэл, Оросын багийг супер сэлгээ аврав. Ингээд Та бүхэнтэйгээ “А” хэсгийн нэг, “В” хэсгийн хоёр тоглолтын үр дүнтэй эргэн уулзъя. Сонирхуулахад, “А” хэсэгт Камерун, Хорват, “B” хэсэгт Австрали, Голланд, Испани, Чилийн багуудын сонирхолтой тоглолт болно. Эдгээр тоглолт манай цагаар өчигдөр шөнө болсон агаад шөнийн 00:00 цагаас “B” хэсгийн Австрали, Голланд, 03:00 цагаас “B” хэсгийн Испани, Чили, 06:00 цагаас “А” хэсгийн Камерун, Хорватын тоглолт тус тус болсон.