Д.Эрдэнэбат: Монгол Улс эдийн засгийн эрхзүйн орчныг либеральчлах чиглэл рүү эргэлт буцалтгүй орж байна

Монголын Үндэсний Худалдаа Аж Үйлдвэрийн Танхим, ОХУ-ын Худалдаа Аж Үйлдвэрийн Танхим болон Бүх Хятадын Олон Улсын Худалдааг Дэмжих Хороотой хамтран Монгол-Орос-Хятадын МҮХАҮТ-уудын 10 дахь удаагийн нэгдсэн чуулга уулзалтыг Монгол Улсад зохион байгуулж байна. Гурван орны  ХАҮТ-уудын бизнесийг дэмжих үйл ажиллагааг хооронд нь уялдуулах, хамтарсан төсөл хөтөлбөр, үйл ажиллагааг хэрэгжүүлэх, хөрш зэргэлдээ оршдог орнуудын хувьд худалдаа, эдийн засгийн асуудал, бэрхшээлүүдийг хамтарсан хүчээр шийдвэрлэх, гурван орны бизнес эрхлэгчдийг холбож өгдгөөрөө онцлогтой юм. Тус хуралдааныг жил бүр ээлжлэн аль нэг улсад зохион байгуулдаг.

Чуулга уулзалтын хүрээнд гурван улс хоорондын бизнесийн ажил хэргийн зөвлөлийн төлөөлөгчид өнөөдөр төрийн ордноо санал солилцох уулзалтыг зохион байгуулсан юм. Энэ үеэр УИХ дахь АН-ын бүлгийн дарга,  ОХУ-тай хамтран ажиллах ажлын хэсгийн зөвлөлийн ерөнхийлөгч Д.Эрдэнэбат хоёр хөршийнхөө эдийн засгийн үйл ажиллагаанд зөв хэлбэрээр хамтран оролцох, транзит тээвэр, бүс нутгийн хөгжил, хил гааль дээр зөв  хэлбэрийн зуучлалын үйлчилгээ үзүүлэхэд бэлэн байгаагаа удаа дараа илэрхийлж ирснээ онцлон дурдлаа. Тэрээр цааш нь хэлэхдээ Монголын өнөөгийн төр засаг  хөрөнгө оруулалт дээр ихээхэн анхаарч ажиллаж байгаа. Бид саяхан Хөрөнгө оруулалтын тухай хуулиа баталж, хөрөнгө оруулалт хийхэд нилээд таатай нөхцөлийг бүрдүүлж өгсөн. Түүнчлэн хөрөнгө оруулагчдын оруулж ирж буй тоног төхөөрөмжийг татвараас хэсэгчилсэн байдлаар чөлөөлөх талаар ярилцаж байна. Мөн жижиг, дунд үйлдвэрлэлийг дэмжихийн тулд гааль, худалдааны татвараас тодорхой хугацаагаар чөлөөлж өгч байгаа. Ашигт малтмалын тухай хуулийн шинэчилсэн найруулга батлагдахаар уул уурхайн салбарын хөрөнгө оруулалт сэргэнэ гэж үзэж байна. Хилийн боомтын тухай хуульд эдийн засгийн чөлөөт бүс байж болно гэдгийг тусгаж өгсөн. Мөн Эдийн засгийн чөлөөт бүсийн тухай хуулийн төслийг УИХ-д саяхан өргөн барьсан. Энэ мэтчилэн эдийн засгийн эрхзүйн орчныг либеральчлах чиглэл рүү Монгол Улс эргэлт буцалтгүй орж байгаа.

Шинжлэх ухаан технологийн чиглэлд мөн хамтран ажиллах сонирхолтой байгаа. ОХУ-тай хил орчмын худалдааг өргөжүүлж, идэвхжүүлэх чиглэлд тодорхой ажлуудыг хийнэ. Тухайлбал, Алтанбулагийн чөлөөт бүсийг 6-р сарын сүүлчээс ажиллуулж эхлэх шийдвэрийг монголын талаас гаргасан байгаа. ОХУ-ын талаас энэ тал дээр санаачилгатай ажиллана гэдэгт итгэж байна. Түүнчлэн хоёр орны иргэд визгүй зорчих тал дээр яриа хэлэлцээрүүдийг хийж байгаа.

Банк санхүүгийн салбарын харилцаа холбоог идэвхжүүлэх талаар олон санаачилга гарч байна. БНХАУ-тай төгрөг, юань солилцож, барааны тэнцлийг хангах чиглэлд нэлээд идэвхтэй ажиллаж байгаа. Үүний нэгэн адил төгрөг, рублийн свобыг хангах тал дээр санаачилгыг эхлүүлж байна. Энэ чуулга уулзалтаас нэлээд үр дүнтэй санал санаачилгууд гарч, гэрээ хэлцлүүд хийгдэнэ гэж хүлээж байгаа гэлээ.

Энэхүү чуулганд ХАА-н болон үйлдвэрлэлийн техник тоног төхөөрөмжүүд, Машин механизм, Эмнэлгийн тоног төхөөрөмж, Нийтийн хоол, Барилга, барилгын материал гэх мэт салбарын томоохон компанийн ОХУ, БНХАУ-ын 100 орчим бизнесийн төлөөлөгчид хүрэлцэн ирж оролцож байгаа юм. Чуулга уулзалтын төгсгөлд гурван улсын худалдаа аж үйлдвэрийн танхимынхан талуудын цаашдын хамтын ажиллагааны чиг хандлагыг тодорхойлсон хамтарсан тунхаглалд гарын үсэг зурах юм байна.

УИХ дахь АН-ын бүлгийн Ажлын албаны Олон нийттэй харицах хэсэг