“Билигт говь” дампуурч, ажилчдаа хулхиджээ

Манай стратегийн ач холбогдол бүхий орд газрууд бүгд хэн нэгэн улстөрчийн халаасанд байдаг гэдгийг надаар хэлүүлэх юун. Монголчууд төдийгүй дэлхий дахины мэдэх Тавантолгой, Оюутолгой гэх мэт уурхайнууд бол яалт ч үгүй төрийн өмчид бүртгэлтэй. Түүнээс бусад томоохон орд газрууд бүгд л хэн нэгэн эрхмийн халаасанд байх аж.

Тухайлбал, Хөшөөтийн уурхай бол яах аргагүй стратегийн ач холбогдолтой хэмээн шинжээчид болон эрдэмтэн мэргэд үздэг ч У.Барсболд гэх эрхэм түүнийг эзэмшиж байх жишээтэй. Эдгээр стратегийн ач холбогдол бүхий ч албан ёсоор бүртгэгдээгүй уурхай бол Дорноговь аймгийн Хөвсгөл сумын Айлбаянгийн уурхай гэдэгтэй хэн ч санал нийлэх байх.
Айлбаян нь металлургын үйлдвэрт ашиглах боломжтой сайн чанарын 14 сая тонн нүүрсний нөөцтэй гэхээр яах аргагүй төрийн мэдэлд байх ёстой гэдэг нь харагдана. Гэтэл тус уурхайн ашиглалтын тусгай зөвшөөрлийг манай нэр бүхий УИХ-ын гишүүн эзэмшдэг бөгөөд хувь нийлүүлдэг томоохон улстөрчийн нэр ч дуулдана билээ.

Энэ уурхай нь нэр бүхий улстөрчийн төрсөн дүү Б.Балдоржийн удирддаг “Коэл” компанийн мэдэлд байдаг юм байна. Тиймээс Айлбаянгийн уурхайн олборлолтыг хариуцаж буй “Билигт говь” компани нь “Коэл”-ийн оператор компани учраас Б.Балдоржийн шууд удирдлагаар ажилладаг, харин “Билигт говь” компанийг Н.Наранбаатар гэх залуу орон нутагт удирдан залдаг аж. Тус компани нь 2011 оны тавдугаар сараас эхлэн Дорноговь аймгийн Хөвсгөл суманд үйл ажиллагаа явуулсан бөгөөд өнөөдөртэй золгоход багагүй хэл ам дагуулсаар байгааг бид олон баримтаас мэдэх билээ.
Тэгвэл Айлбаянгийн уурхайд олборлолт явуулж байгаа “Билигт говь” компани дампуурчээ.

Ажилчдынхаа сүүлийн хэдэн сарын цалинг тавиагүй бөгөөд өдгөө бүр үүдээ барьсан аж. Тус компани нь банкнаас их хэмжээний зээл авч, барьцаанд нь орчин үеийн машин техникээ тавьсан байна. Харин тэд сүүлдээ зээлийнхээ хүүг ч төлж чадахгүйд хүрч, банк нь “Билигт говь”-ийн барьцаалсан машинуудыг зараад эхэлжээ. Саяхан гэхэд л тус компанийн барьцаалсан зургаан машиныг Төв аймгийн Заамар суманд үйл ажиллагаа явуулж байгаа уул уурхайн компани худалдаж авсан байна. Өнөөдөр эдийн засгийн байдал хүндэрч, ялангуяа гадагшаа нүүрсний экспортын үнэ унасан энэ үед уул уурхайн компаниуд шил шилээ харан үүдээ барьж байгаа нь үнэн.

Гэхдээ компаниуд ажилчдаа ямар нэгэн байдлаар хохиролгүй болгож байгааг албаныхан мэдээлсэн. Гэтэл “Билигт говь” нь сүүлийн зургаан сар ажилчдынхаа цалинг тавиагүй байж, тэдний гарыг цайлгах цөөхөн ч гэсэн мөнгө өгөөгүй тухай ажилчид нь гомдоллосон юм.
С.Баяр