Эмчид итгэснээс наранд даатгасан нь дээр болж

Эргэлзэх шалтгаан нь 0-3 насны хүүхдэд улсаас үнэ төлбөргүй сар бүр уулгаж буй D витаминтай холбоотой. Ма­най дүүгийн хүүхэд нэг нас зургаан сартай. Гэтэл түүнд уг витамины илүүдэл гэсэн шинж тэмдэг илэрснээс болоод рахит, тархины даралттай болсон гэх юм. Яг энэ өвчний шинж тэмдэг бүхий бага насны хүүхдээ тэ­вэрсэн эхчүүд сүүлийн үед Эх нялхсын эрдэм шинжилгээний төвийг олноор зорих болжээ.

Сар бүр уулгаж буй D вита­ми­­наас болсон болж хүүхэд өв­чилс­­ний хариуцлагыг хэн хү­лээх вэ, яаж эмчлэх ёстой эсэх талаар салбар хариуцсан яам­ны мэргэжилтнээс тод­руу­лахад “Улсын хэмжээнд D ви­та­мины илүүдэлд орсон гэх мэ­дээлэл ирээгүй. Үндэслэл ч байхгүй. Витамины илүүдэл, дутагдал хоёрт ижилхэн шинж тэмдэг илэрдэг. Түүнийг шин­жилгээгээр тогтоодог юм” гэс­нээс өөр хариулт өгөхийг хүс­сэнгүй.

Гэтэл нэгэн хүүхдийн ху­вийн эмнэлгийн захирал, хүний гавьяат эмч н.Баяраа сүүлийн үед D витамины илүүдэлд ор­сон хүүхдүүд манай эмнэлэгт ол­ноор ирэх болсон гэсэн эсрэг тэсрэг байр суурийг илэрхийлж байна.

Монголчуудын хувьд дэл­­хийн тэнхлэгийн 45 градус өр­гөр­гөөс хойшхи орнуудад нар­­ны туяа бага тусдаг гэх үн­дэс­лэлээр 0-3 насны хүүхэд бү­рийг витаминжуулж буй. Уг витамины хоногийн тунг 3000 мг-аар дээш хэтрүүлж бол­доггүй гэнэ. Хамгийн гол нь D витамин илүүдсэнээс өсөлт зог­сох, амархан ядарч сульдах гээд шинж тэмдгүүд аажимдаа илэр­дэг болохоор аюул, эрсдэл ихтэй байдаг аж. Гэтэл энэхүү бага насны хүүхдэд уулгаж буй D витамин эрүүл мэндэд сөргөөр нөлөөлж буйд одоогоор анхаарч буй газар үнэндээ алга. Бүгд л нэр төр, албан тушаалаа хамгаалж үлдэхээр “хөлс алдсан хүүхэд, анхаарал тавиагүй эцэг эхийн буруу” гэдгээр ам таглаад өнгөрөхийг оролдоно.

Олон жил хүүхдийн эмчээр ажилласан, хашир туршлагатай ганц нэг эмч, мэргэжилтнүүд 0-3 насны хүүхдүүдийн эрүүл мэн­дэд тулгамдсан асуудал бол D витамины илүүдэл гэх өв­чин газар аваад буйд сэтгэл эмзэглэж буйгаа нуухгүй бай­гаа. Энэ байдлаас авч үзвэл D витаминыг хаанаас хэн гэгч этгээд нийлүүлээд байгаа, чана­рын шаардлага хангаж байгаа эсэх зэрэгт анхаарах хэрэгтэй юм шиг. Эрүүл мэндийн яамны холбогдох мэргэжилтнээс тод­руулахад “Бага насны хүүх­­дүүдийг D витаминаар хангах ажлыг Дэлхийн эрүүл мэндийн байгууллага, НҮБ, “Дэлхийн зөн” олон улсын байгууллагууд ний­лүүлдэг болохоор ямар ч эрсдэл байхгүй” гэх юм билээ. Томоохон байгууллагууд л оруулж ирэхдээ найдвартайг нь оруулж ирнэ гэсэн тогтсон дү­рэм, журам хаанаас байх билээ.

Хамгийн чухал нь хэзээ үйлдвэрлэсэн, хаана яаж тээвэр­лэсэн, хэрхэн хадгалж байгаа, хүчинтэй хугацаа гээд бүхий л шаардлагууд шат, шатанд мөрдөгдөж байх ёстой. Энэ байдалд харин холбогдох газ­рынхан хяналт тавьж байгаа эсэх нь бас л эргэлзээтэй. Хаа хаанаа хариуцлага сул байдгийн гайд бяцхан хүүхдүүдийн эрүүл мэнд хохирох ёсгүйг хол­богдох албаны удирдлагууд анхааралдаа аваасай.

Хүний гавьяат эмч н.Баяраа эмчийн хэлж буйгаар D вита­миныг өндөр тунгаар өг­вөл хүүхдийн эрүүл мэндэд аюул­тайгаар барах уу, хор хөнөөл нь тэр даруйдаа биш, хожим илэрдэг гэж хэлж байгаагаар бол ирээдүй хойч үеийнхний минь эрүүл мэнд дээсэн дөрөөн дээр байгаа гэж хэлж болмоор. Энэ мэтээр хийсэн хэргээ далдлах аргад гаршсан эрүүл мэндийн салбарын удирдлагууд учир мэдэхгүй бяцхан иргэдийнхээ эрүүл мэндээр тоглох хэрэг байна уу, та минь.

Яршиг зүгээр, хэн нэгний сайн гэсэн бүхнийг өгч хүүх­дийнхээ эрүүл мэндийг хор­дуулсанаас дэлгэр зуны цагт наранд даатгаад нөгөөх D ви­таминыг нь авах нь дээр ч юм уу.

Д.ДОЛГОР
Зохиогчийн эрх: “Ардын эрх” сонин