Оюутолгойг хэлэлцээрийн ширээнд суухыг шаардав

МҮЭХ-ны дэд Еренхийлөгч С.Эрдэнэбат, Монголын Эрчим хүч Геологи уул уурхайн үйлдвэрчний эвлэлийн холбооны дарга С.Ганболд нар “Оюутолгой” ХХК-ны 300 орчим ажилтнаа цомхотгох мэдэгдэл өгч эхэлсэнтэй холбогдуулан хэвлэлийн бага хурал хийлгэлээ.

С.Эрдэнэбат
-”Оюутолгой” ХХК 300 орчим ажилтанд цомхотгох мэдэгдэл өгсөн талаар мэдээлэл байна. Аливаа цомхотгол, бүтцийн өөрчлөлт хийхдээ ҮЭ-ийн байгууллагуудтай нь гэрээ хэлэлцээ хийдэг байх ёстой. Ажлаас хална гэдэг бол хамгийн сүүлчийн арга хэмжээ юм. Тиймээс МҮЭХ-ноос “Оюутолгой” ХХК-д хандаж, хуулийн дагуу ҮЭ-ийн холбоо болон салбарын үйлдвэрчний эвлэлүүдтэй ажилчид цомхотгох, бүтэц зохион байгуулалтын асуудпаар хэлэлцээрийн ширээнд суух, нийгмийн хамгаалалтай холбоотой асуудлаар тусгай гэрээ байгуулахыг нэг талаас уриалж, нөгөө талаас шаардаж байна.

“Оюутолгой” ХХК удирдлага, албан тушаалтнууд яг хичнээн хүн, яаж цомхотгох талаар албан ёсны мэдээллийг өгөхгүй байна. Жишээлбэл эдийн засгийн хүндрэл гарах болгонд ажилчдаа цомхотгоод байх юм уу, хамгийн түрүүнд монголчуудыг халах юм уу, ямар ажлын байруудыг шингээх бололцоотой байна гэх мэт мэдээллийг ил тод өгөөч гэсэн шаардлагыг мөн тавьж байна.

Төр, яам хаана байна вэ. Холбогдох байгууллагууд зохих арга хэмжээг аваач гэсэн хүсэлтийг гаргаж байна.
“Ажилтнаа цомхотгоно гэдэг нь зардал хэмнэж байгаагийн илрэл. Тэгвэл тус компанид ажилтнаа цөөлөхөөсөө илүүтэйгээр танаж, хэмнэж болох зардал байгаа эсэхийг судалж үзэх хэрэгтэй. Эдийн засгийн хүндрэл байгаа гэдгийг ойлгож байна. Гэхдээ энэ үед аливаа компани хариуцлагаа ухамсарлаж, хууль дүрмээ баримтлах ёстой. Хүнийг ажилгүй болгох шиг амархан зүйл байхгүй. Эргээд энэ ачаалал Монгол Улсын Засгийн газар, төр нийгэмд сөргөөр нөлөөлнө” гэж хэлсэн юм.

ХӨДӨЛМӨР