Ханшийн өсөлтөөс шалтгаалан бензиний үнэ ахин нэмэгдэх нь
Шатахууны үнийг төгрөгийн ханшийн сулрал ам.долларын огцом өсөлтөөс шалтгаалан дунджаар 40-50 төгрөгөөр нэмэх тухай Газрын тосны газрын дарга Г.Өлзийбүрэн “Ил тод уул уурхай” хэвлэлийн хурлын үеэр мэдэгдлээ.
Манай улс ОХУ-аас авах газрын тосны бүтээгдэхүүний хэмжээг багасгаснаар “Роснефть” компани үнэ бууруулах, бүтээгдэхүүний хэмжээгээ өсгөх алхмыг хийсэн. Үүнтэй холбоотой өнгөрсөн оны гуравдугаар сард гаргасан үнийн томъёог Сингапурын биржийн үнэ дээр суурилах өөрчлөлт хийснээр шатахууны хилийн үнийг тодорхой хэмжээгээр бууруулсан. Тодруулбал 1360 ам. долларыг 963 ам.долларт хүргэсэн юм. Тэгвэл өнөөдөр шатахууны жижиглэн дээр 85-98 цент нэмж борлуулж буй аж.
Ам. долларын ханшийн өсөлтөөс үүдэн өнгөрсөн наймдугаар сараас эхлэн шатахуун импортлогчид алдагдалтай явж ирсэн ч үнийг аль болох нэмэлгүй барьж иржээ. Тиймээс шатахууны үнийг нийгмийн донсолгох хэмжээнд хүргэхгүйгээр нэмнэ хэмээн албаныхан онцолж байна. Өнөөдрийн байдлаар улсын хэмжээнд дунджаар ердийн хэрэглээний 40 хоногийн газрын тосны бүтээгдэхүүний нөөцтэй байгаа бөгөөд үүнээс А-80 автобензин 49, Аи-92 автобензин 57, дизелийн түлш 42, ТС-1 13 хоногийн нөөцтэй байна.
Б.Заяа
монцамэ
URL:
