Талийгаач Д.Амарсайхантай хамт хорьж байсан Н.Отгонболдын өмгөөлөгч О.Сайнгэрэл зодуулж, нүүрэндээ хүнд гэмтэл авчээ

Хууль зүйн болон Хүний эрхийн дэд хорооноос найман сар хоригдож байгаа Х.Анхбаяр нь биеийн жингээ их хэмжээгээр алдаж байгаа гэдэг асуудлаар О.Баасанхүү гишүүнд томилолт өгөн ажиллуулжээ. Өөрөөр хэлбэл, талийгаач Д.Амарсайханы хэрэгт холбогдуулсан “Тэгри холдинг” компанийн ерөнхий захирал Х.Анхбаярыг саатуулсан байдаг. Харин Хууль зүйн болон Хүний эрхийн дэд хорооноос томилолт авсан тэрбээр Х.Анхбаяртай уулзах гэхэд Бямбажав гэх мөрдөн байцаагч О.Баасанхүү гишүүнээс байцаалт авах гэсэн гэдэг. Нөгөөтэйгүүр 461 дүгээр ангид очих үеэд саатуулж байсан Х.Анхбаярыг авч зугтаасан явдал гарчээ. Тиймээс О.Баасанхүү гишүүн ШШГЕГ-т энэ талаар хандсан ч хорьж буй хүмүүстэй уулзуулахгүй байсаар өдийг хүргэсэн аж.

Харин Хятадын “Петрочайна Дачин Тамсаг” компанийн хоорондын бүтээгдэхүүн хуваах гэрээгээр орж ирсэн мөнгөнөөс завшсан гэх хэрэгт Х.Анхбаяр, Н.Отгонболд, Д.Амарсайхан, Ц.Чандмань нарыг холбогдуулан шалган саатуулаад байсан. Гэвч Газрын тосны газрын дарга Д.Амарсайхан нь энэ сарын 13-нд хорих ангидаа өмгөөлөгчтэйгээ уулзаж байхдаа нас барсан харамсалтай хэрэг гарсан юм. Тиймээс энэ асуудалд холбогдуулан талийгаач Д.Амарсайханы өмгөөлөгч байсан Р.Пүрэмлхам холбогдох байгууллагад хандсан гэдэг. Гэвч Х.Анхбаяр, Н.Отгонболд, Ц.Чандмань нарт холбогдох хэргийг шүүх хурал өчигдөр ШШГЕГ-ын харьяа 461 дүгээр хорих ангид болсон ч энэ сарын 29-нийг хүртэл хойшлуулсан юм. Учир нь Н.Отгонболдын өмгөөлөгч нь зодуулж, хамраа хугалуулсанаас шүүх хурлыг явуулах боломжгүй болсноор хойшлуулжээ. Н.Отгонболдын өмгөөлөгчөөр нь МАХН-ын дарга Н.Энхбаярыг өмгөөлж байсан О.Сайнгэрэл ажиллаж байгаа юм. О.Сайнгэрэлийн хувьд хамраа хугалуулснаас гадна нүдээ цохиулж нүүрэндээ хүнд гэмтэл авсан байна.