МУ-ын ерөнхийлөгч Ц.Элбэгдоржтой хийсэн ярилцлага

Азид хамтын ажиллагаа итгэлцлийг бэхжүүлэх бага хурлын 4 дэх дээд уулзалтад оролцохоор Шанхай хотноо хүрэлцэн ирсэн Монгол Улсын ерөнхийлөгч Цахиагийн Элбэгдорж 5-р сарын 20-нд манай радиогийн сурвалжлагч Сарантуяад тусгай ярилцлага өгсөн юм. Та бүхэнд энэ ярилцлагыг хүргэе.

Сэтгүүлч: та 2010 оны Шанхайн Дэлхийн яармагийн нээлтийн ёслолд оролцож байсан. Энэ удаа Азид хамтын ажиллагаа итгэлцлийг бэхжүүлэх бага хуралд мөн биечлэн оролцож байна. Хятад улсын энэ хэдэн жилийн хөгжлийн талаар та ямар сэтгэгдэлтэй байдаг вэ?

Ерөнхийлөгч: Би Шанхай хотод гуравдагч удаагаа ирж байгаа, өмнө нь намын дарга байхдаа 2010 онд ирж байсан, тухайн үед БНХАУ-ын дарга Хү Жиньтао байсан, Ши Жиньпин дэд дарга байсан, бид уулзах сайхан боломж гарч байсан юм. Шанхай хот маш том хот юм, ирэх бүхэн Шанхай хотын хөгжлийг гайхдаг, манай хөрш БНХАУ-ын хөгжил маш сайн явж байгаад би баярлаж явдаг.

Сэтгүүлч: Азид хамтын ажиллагаа итгэлцлийг бэхжүүлэх бага хурлын 4 дэх дээд уулзалт яг одоо болж байна. Энэ хурал бүс нутгийн аюулгүй байдалд ямар үүрэг гүйцэтгэж байна гэж үздэг вэ? Хятад улсад анх удаа зохион байгуулж байгаа энэ хурлаас та ямар үр дүн хүсэж байна вэ?

Ерөнхийлөгч: Миний хувьд энэ хуралд оролцохоор ирж байгаа бүс нутгийн орнуудын удирдлагуудтай уулзах сайхан боломж гарч ирдэг. Тэгээд мөн ярьж байгаа сэдвээр өөрийн орныхоо байр суурийг илэрхийлэх боломж гарч ирдэг. Би энд ирээд БНХАУ-ын дарга Ши Жиньпинтай албан ёсны уулзалт хийсэн, өглөөний цай хамт уусан, маш сайхан элэгсэг дотно яриа өрнүүлсэн, манай хоёр орны хооронд шийдвэрлэх шаардлагатай асуудлууд оршиж байгаа, эдийн засгийн, дэд бүтцийн томоохон асуудлууд байгаа, эдгээр асуудалд Ши Жиньпин дарга маш их анхаарал хандуулж, ажиллаж байгаа. Үүнд бид их баяртай байгаа. Би бас ОХУ-ын ерөнхийлөгч Владимир Путинтэй уулзах болно. Ийм элэгсэг дотно яриа уулзалт улс орнуудын найрсаг хамтын ажиллагааг бэхжүүлэхэд их тус болдог. Мэдээж энэ хурал дээр бүс нутагт байгаа аюулгүй байдлын асуудал, тодорхой ярилцах шаардлагатай асуудал дээр улс орны удирдлагууд өөр өөрийн байр суурийг илэрхийлж ярих байх. Монгол улсын хувьд ч гэсэн бид өөрийн байр суурийг ярьж идэвхтэй оролцоно.

Сэтгүүлч:  Энэ жил Хятад Монгол хоёр орны дипломат харилцаа тогтоосны 65 жил, Хятад Монголын найрсаг харилцаа, хамтын ажиллагааны гэрээг байгуулсны 20 жилийн ой тус тус тохиож байна. Манай хоёр орны харилцааны хөгжлийн одоогийн байдал, алс ирээдүй талаар та бодлоо хуваалцана уу.

Ерөнхийлөгч:  Манай хоёр орны харилцааг стратегийн хамтын ажиллагаа гэж томьёолдог. Манай хоёр орны харилцаа хамгийн гол нь хоёр ард түмний нийтлэг эрх ашигтай нийцдэг харилцаа учир стратегийн харилцаа. Тэгээд 2013 оны 10 сард манай хоёр орны засгийн газар стратегийн харилцаагаа хөгжүүлэх дунд болон урт хугацааны хөтөлбөрийг баталсан. Хоёр орны харилцааны гол гол асуудлуудыг шийдвэрлэхээр тавигдсан байгаа, энэ ажлуудыг хоёр талдаа анхааран хийгээд явж байгаа, ноднин би бас БНХАУ-ын дарга Ши Жиньпинтай ШХАБ-ын дээд уулзалт Киргиз улсад болоход уулзсан, түүнээс хойш манай хоёр орны албаны хүмүүсийн уулзалтууд улам их болж, их сайн үр дүн гарч байгаа. Би сая Ши Жиньпин даргыг энэ онд Монгол улсад төрийн айлчлал хийхийг урьсан. Энэ жил бол Хятад Монгол хоёр орны дипломат харилцаа тогтоосны 65 жил, Хятад Монголын найрсаг харилцаа, хамтын ажиллагааны гэрээг байгуулсны 20 жилийн ой тохиож байгаа. Манай хоёр орны харилцаа маш идэвхтэй хөгжиж байгаа учраас Ши Жиньпин даргын айлчлал цаг үеэ олсон чухал айлчлал байх болно гэж би итгэж байна.

Сэтгүүлч: Хятад Монгол хоёр орны эдийн засаг худалдааны харилцаа улам өргөжин тэлж байна. Хоёр орон ямар салбарт хамтын ажиллагаагаа эрчимжүүлэх ёстой гэж та үздэг бэ?

Ерөнхийлөгч: Бид зах зээлийн эдийн засагт шилжсэнээс хойш алдаж онож байгаа олон зүйлүүд байгаа. Ер нь сүүлийн жилүүдэд манай улсын эдийн засаг эрчимтэй хөгжиж байгаа. Ойролцоогоор 10 хувиар хөгжиж байна. Тийм учраас эдийн засгийн энэ хөгжил БНХАУ-тай харилцаж байгаа харилцаатай нягт холбоотой юм. Энэ өсөлтийг бид улам бэхжүүлэх ёстой. Бэхжүүлэхийн тулд бидний хооронд дэд бүтцийн шинжтэй томоохон шийдвэрлэх асуудлууд байна. Дэд бүтцийн бүтээн байгуулалтууд хийх хэрэгтэй байгаа. Мөн уул уурхай дээр томоохон төслүүд хэрэгжүүлэх хэрэгтэй. Үүнээс гадна хөдөө аж ахуйн салбар гэж маш том уламжлалт салбар байгаа. Мөн ард иргэдийн хоорондын харилцаа, хүмүүнлэгийн чиглэлийн харилцаанууд байгаа. Эдгээр ажлуудыг, бид цаашид идэвхжүүлэх шаардлагатай байна. Одоо эдгээр хүлээгдэж байсан олон жилийн яригдаж байсан асуудлуудыг шийдвэрлэх сайхан боломж бүрдэж байна гэж бодож байна.

Сэтгүүлч: НҮБ-ын Байгаль орчны хөтөлбөрөөс олгодог “Эх дэлхийг хамгаалагч” цолыг 2012 онд та хүртэж байсан. Байгаль орчныг хамгаалах талаар Монгол улс ямар бодлого хэрэгжүүлж байгаа вэ? Мөн байгаль хамгаалах асуудал нь Хятад улсын хувьд ч тулгамдаж байгаа чухал асуудал. Хятад Монгол хоёр орон энэ салбарт ямар хамтын ажиллагаа өрнүүлж болох вэ? Энэ талаар таны бодлыг сонсъё оо.

Ерөнхийлөгч: Манай хоёр орны газар нутгийн нэлээд хэсэг нь цөлжиж байгаа, энэ талаар бид хамтарч ажиллах бүрэн боломж бий. Энэ чиглэлд БНХАУ-ын туршилгаас Монгол улс суралцан хамтарч ажиллах сонирхолтой байдаг. Би ерөнхийлөгч болоод Монгол улсад жилдээ мод тарих хөдөлгөөн бий болгож маш олон сая мод тарьж байгаа. Ногоон байгууламжуудыг асар ихээр бий болгож байгаа. Шинээр байшин барихад хажууд нь заавал ногоон байгууламж байх ёстой гэж үзэж, том уурхай нуудыг ашиглахад заавал нөхөн сэргээж байх ёстой гэсэн шаардлагуудыг тавьж байгаа. Мөн агаарын бохирдлын асуудал манай хоёр орны төв суурин газруудад их хүндрэлтэй асуудал болоод байна. Энэ асуудлыг хамтарч шийдвэрлэхээр бид ярилцаж байгаа. Байгаль орчны энэ асуудлыг шийдвэрлэх нэг гол зүйл бол сэргээгдэх эрчим хүч, манай говийн бүс нутагт нарны эрчим хүч, салхины эрчим хүчийг ашиглах том боломж байгаа, зөвхөн нүүрсний эрчим хүчийг ашиглахаас гадна сэргээгдэх эрчим хүчийг давхар ашиглах гэж бодож байна. БНХАУ-д эрчим хүчний том хэрэгцээ байна, Монгол улсын нүүрсний уурхайг түшиглэн эрчим хүчээ БНХАУ-д худалдаж болно, үүний зэрэгцээ бас сэргээгдэх эрчим хүчийг хослуулан хөгжүүлье гэсэн санал тавьж хамтарч ажиллаж байна. Иймэрхүү байдлаар байгаль орчны асуудлаа шийдье. Бид өөр өөр улс байгаа боловч дэлхийн хэмжээнд авч үзвэл, дэлхий гэдэг бол нэг гэр бүл юм, тийм учир энд тулгамдаж байгаа байгаль орчны асуудалд хамтдаа анхаарах ёстой, энэ талаар БНХАУ бидний байр суурийг ойлгож дэмжиж хамтарч ажиллаж байгаад бид баяртай байна.

china radio