С.Баяр, С.Баярцогт нар МАН-АН -г дахин бүрдүүлэх гэж байгаа юу?

Өчигдөр УИХ-ын нэгдсэн чуулганаар эдийн засгийг идэвхижүүлэх зарим арга хэмжээний тухай УИХ-ын тогтоолын төслийн эцсийн хэлэлцүүлгийг хийж, хуралдаанд оролцсон нийт гишүүдийн 70.2 хувийн саналаар баталлаа.
Энэ үеэр УИХ-ын гишүүн С.Баярцогт индэр дээрээс албан ёсоор МАН-тай хамтарч, Үндэсний Эв Нэгдлийн Засгийн газар байгуулах саналыг АН, МАН-д уриалав.

Тодруулбал тэрээр : “Хаврын чуулган эхэлснээс хойш авсан арга хэмжээ, хэлэлцсэн асуудлыг харахаар үнэхээр гунигтай байна. Дандаа улс төржсөн хэдхэн асуудал тойрч, яриад ажлын тухай юу ч яриагүй байна. Ийм яриа явах болгонд бид нарын зай холдож байна. Ойлголцол байхгүй болж байна. Тийм учраас би дахиад уриалж байна.
Би өмнө нь ч хэлсэн. Өндөр хэмжээний улс төрийн зөвшилцилгүйгээр эдийн засгийг эрчимжүүлж чадахгүй. Одоо л ярьж эхлэхгүй бол оройтно.
Одоо Үндэсний Эв Нэгдлийн Засгийн газар л хэрэгтэй.
АН-ын дарга Н.Алтанхуяг, МАН-ын дарга М.Энхболд нар яаралтай яриа, хэлэлцээрт орох хэрэгтэй.
Яаралтай ажил хэрэг болгоочээ, хамтарсан Үндэсний Эв нэгдлийн Засгийн газар байгуулж байж л бид эдийн засгаа эрчимжүүлж чадна.
Ерөнхий сайд Засгийн газартаа бүтцийн өөрчлөлт хийж, Үндэсний эв нэгдлийн Засгийн газар байгуулаач ээ.” хэмээсэн юм.

Мэдээж С.Баярцогт чуулганы индэр дээрээс тохиолдлоор юм уу? сэтгэлийн хөдөлгөөнөөр дээрх үгсийг хэлээгүй, хэлэх ч үгүй.
Эх сурвалжуудын өгүүлж буйгаар С.Баяр, С.Баярцогт нар МАН-АН -гийн Засгийн газар байгуулах ажлыг нэгэнт зохион байгуулж эхэлсэн бөгөөд тэд Н.Алтанхуягт дэмжлэг үзүүлж, хариуд нь Х.Баттулгын бүлэглэлийг АН-аас нэгмөсөн шахах ажлыг гардан гүйцэтгэх гэнэ.

П.Мандах

sonin.mn