Улаанбадрах, Зүүнбаян сумдын малчны хотны эмгэнэлт дүр төрх

“Урангүй Монгол”, “Босоо хөх Монгол” зэрэг иргэний нийгмийн байгууллагууд ураны аюулд өртсөн гэх Дорноговь аймгийн Улаанбадрах, Зүүнбаян сумдаар явж нөхцөл байдалтай танилцахдаа үнэхээр сэтгэл өвтгөм дүр зурагтай учирчээ.

“Улаанбадрах, Зүүнбаян сумдад байдал маш ноцтой байна. Захын айлаар ороход л уранд хордож үхсэн хурга ишиг хогон дээр нь бөөгнөрчихсөн байжээ. Замдаа хоёр малчин айлд ороход нэгэнд нь 17 хурга ишиг үхчихсэн, нөгөөд нь үсгүй ботго төрсөн гэх ч малчидтай таарчээ. Тус сумын малчин н.Туяа гэх эмэгтэйгийнд хоёр ч үхэр үхжээ. Тэдгээр үхэрнүүдийн нь элэг юу ч үгүй, задарч идээлсэн байжээ.

Тиймээс тэд нутгийн ард иргэдтэй хамтран тус аймагт ураны олборлолт явуулж буй Францын “Арева” группын охин компани болох “Кожеговь” компанийн байранд очиж төлөөллүүдтэй уулзан, үйл ажиллагаагаа зогсоохыг шаарджээ. Уг нь иргэний нийгмийн байгууллагын төлөөллүүд Дорноговь аймгийн удирдлагуудтай хамтран хурал зохион байгуулахаар төлөвлөж байсан ч аймгаас ямар нэгэн төлөөлөл ирээгүй гэнэ. Харин “Кожеговь” компанийн зүгээс тэдэнд ямар нэг тайлбар хариулт өгөөгүй бөгөөд уулзахаас татгалзаж байсан ч хүчтэй эсэргүүцэл үзүүлсний улмаас гарч ирэхээс аргагүй байдалд хүрсэн гэнэ. Иргэний нийгмийн байгууллагууд “Кожеговь” компанийг даруйхан үйл ажиллагаагаа зогсоож, ураны олборлолт явуулахгүй байхыг анхааруулсан байна.