160 дугаар цэцэрлэгийн багш нар эцэг эхчүүдээс мөнгө татсан байжээ

Мэргэжлийн хяналтын ерөнхий газраас улсын хэмжээнд үйл ажиллагаа явуулж буй сургуулийн емнөх боловсролын байгууллагуудад төлөвлөгөөт хяналт шалгалтыг хийж байгаа юм. Шалгалтын явцад нийслэлийн Сүхбаатар дүүргийн 160 дугаар цэцэрлэг зарим эцэг эхчүүдээс бэлэн мөнгө хураан авч байгааг шалгаж өгөх хүсэлт ирсний дагуу хянаж үзэхэд Боловсролын тухай хуулийн 40 дүгээр зүйлийн 40.7-т заасны дагуу хуульд заагаагүй төлбөр хураамж авсан болох нь тогтоогдсон тул 2014 оны дөрөвдүгээр сарын 05-ны дотор буцаан олгох шийдвэр гаргасан,

Уг шийдвэрийн дагуу тус цэцэрлэгийн удирдлага хууль бус хураан авсан бэлэн мөнгийг эцэг эхчүүдэд буцаан олгож, цаашид хууль бус төлбөр хураамж авахгүй байхыг нийт багш нартаа үүрэг болгосон байна. Тус цэцэрлэгийн эцэг эхийн зөвлөлийн хурлаас бүлгүүдийг камержуулах санаачлага гаргаж, нийт 320 хүүхдээс 226 нь дэмжсэн санал гаргаснаас 97 хүүхдийн эцэг эхүүд бэлнээр 2 сая 788 мянган төгрөгийг эцэг эхийн зөвлөлд хураалгасан байжээ. Цаашид эцэг эх, асран хамгаалагчдаас хуульд заагаагүй төлбөр хураамж авахгүй байх, байгууллагынхаа үйл ажиллагаанд дотоод хяналт шалгалтаа сайжруулахыг Мэргэжлийн хяналтын байгууллагаас нийт цэцэрлэгийн удирдлагуудад зөвлөж байна.