Их хэмжээний үзмэн мана чулуу хилээр гаргахыг завджээ

Өнгөрсөн баасан гарагт их хэмжээний үзмэн мана чулуу хилээр гаргах гэж байсныг илрүүлжээ.

Уг хэрэг Өмнөговь аймаг дахь Шивээхүрэнгийн шалган нэвтрүүлэх боомтот гарсан байна. Тодруулбал БНХАУ руу нүүрс тээвэрлэдэг 68-14 ӨМӨ улсын дугаартай хүнд даацын автомашиныг хилээр нэвтрэх үед нь Хилийн тагнуулын ажилтнууд түр саатуулан нарийвчилсан үзлэг шалгалт хийхэд уг машины жолооч Өвөрхангай аймгийн Төгрөг сумын харьяат И нь 205 килограмм байгалийн чулуу нүүрсэн дор нууж авч гарахыг завджээ.

Тус аймгийн иргэн Б-гээс 1000 юань авч чулууг нь хил нэвтрүүлэхээр урьдчилан тохиролцсон болохоо хүлээжээ. Уг хэргийг одоогоор Өмнөговь аймгийн Гурвантэс сумын Цагдаагийн хэсэг шалгаж байгаа юм.

Цагдаагийнхан хилийн тагнуулын албанаас ирүүлсэн материалын дагуу эрүүгийн хэрэг үүсгэн шалгаж эхлээд байгаа аж.

Эх сурвалж: Шуурхай.мн