Н.Золжаргалыг зайлуулахгүй бол байдал улам хүндэрсээр

Энэ Засгийн газрын АТМ маягаар ажиллаж, мөнгөний бодлогоо унагачихсан Монгол банкны удирдлагад хариуцлага тооцох цаг аль хэдийнээ болжээ. Эдийн засгийн уруу дорой байдал, валютын ханшийн өсөлт гээд өнөөдрийн хямралыг бий болгоход гол дүрд тоглосон хүн бол яах аргагүй Н.Золжаргал. Тэр Төв банкны ерөнхийлөгч болсон цагаасаа эхлээд л Н.Алтанхуягийн мөнгөний машин шиг л ажиллаж ирсэн. Үнэ тогтворжуулах хөтөлбөр нэрээр Засгийн газрын сайдуудын бизнесийг дэмжихээс эхлээд Н.Золжаргал Төв банкийг хар захын замаар ажиллуулж өнөөдөртэй золгоход Монгол Улсын мөнгөний бодлого нэгэнт алдагдаж, эдийн засаг хэзээ сэргэх нь мэдэгдэхгүй унтчихлаа. Хувийн ашиг сонирхолдоо хөтлөгдсөн Монгол банкны ерөнхийлөгч Н.Золжаргал эрх баригчдын дохио зангаагаар ажиллаж хүнд байдалд орлоо. Уг нь аливаа улсын Төв банк эрх баригч болон бусад улстөрийн хүчнээс хараат бус байж, мөнгөнийхөө бодлогыг барьж явдаг. Гэтэл манай улсын Төв банкны Ерөнхийлөгч нь эрх баригч хүчинд үйлчилж, улстөрчдийн мөнгөний касс шиг ажилласаар өнөөдрийн хүнд нөхцлийг бий болгочихлоо. Зөвхөн үүгээр ч зогсохгүй Н.Золжаргал ерөнхийлөгчийн бусадтай нийлж, ихээхэн хэмжээний мөнгөнд гар дүрсэн таагүй мэдээлэл ч тэнүүчлэх болов. Хэргийг тодруулбал,

2011 оны 07 дугаар сарын 08-ны өдөр Банкны эрсдэл даах чадварыг дээшлүүлж, хувь нийлүүлэгчдийн санхүүгийн хариуцлагыг өндөржүүлэх зорилготой, Банкуудын дүрмийн санг 2013 оны тавдугаар сарын 01-ний өдрийн дотор 16 тэрбумд хүргэхийг банкуудад даалгасан Монголбанкны Ерөнхийлөгчийн 404 тоот тушаал гарсан байдаг. Гэтэл “Транс” банкны багаахан хувьцаа эзэмшигч Д.Энхтайван үүнийг ашиглан тус банкинд дахь өөрийн хувиа өсгөх санаархал бүхий хууль бус үйл ажиллагаандаа өнөөгийн Монголбанкны ерөнхийлөгчийн дэмжлэгийг авсан байна. Тодруулбал Монголбанкны ерөнхийлөгчийн 404 тоот тушаалын үүрэгт хугацаа дуусгавар болсоноос хэзээ хойно буюу 2013 оны 8 дугаар сард “Транс” банкны найман хувийн хувьцаа эзэмшигч Д.Энхтайваны Тээвэр хөгжлийн банкны хувь нийлүүлсэн хөрөнгийг 8.0 тэрбум төгрөгөөр нэмэгдүүлэх хүсэлтээ Монголбанкинд гаргажээ. Ингэхдээ Д.Энхтайван нь дээрх найман тэрбум төгрөгийг “хуулиар хүлээн зөвшөөрөгдсөн үйл ажиллагаанаас олсон цэвэр ашгаас бүрдэж байгаа” хэмээн мэдүүлсэн байдаг ч яг ямар үйл ажиллагаанаасаа найман тэрбумын цэвэр ашиг олсон нь тодорхойгүй.

Гэхдээ тухайн үед Монголбанкны дэд ерөнхийлөгч Б.Жавхлангаас эхлээд тус банкны нэр бүхий албан тушаалтнууд “Транс” банкны хувьцаа эзэмшигчид болох Д.Энхтайван нарын тус банкин дахь хөрөнгийг найман тэрбумаар нэмэгдүүлэх хууль зүйн үндэслэлгүй гэдгийг Монголбанкны ерөнхийлөгчид удаа дараа сануулан, “болгоомжлох”-ыг анхааруулсаар байтал Монгол банкны Ерөнхийлөгч Н.Золжаргал  2013 оны наймдугаар сарын 27-ны өдөр А-1/1110 дугаар албан бичгээрээ Д.Энхтайваны хүсэлтийг дур мэдэн ёсчлон биелүүлж, тэр бүү хэл эх сурвалж нь тодорхойгүй найман тэрбум төгрөгийг гурав хоногийн турш Монголбанкны дансанд байршуулж байгаад гурван жижиг компаниудын дансанд хуваан гаргасан, “мөнгө угаасан” байж болзошгүй сэжиг бүхий хэрэгт гар дүрэлцсэн нь ил болов. Ийн Монголбанкны мэргэшсэн, бие даасан байдлыг бүрэн алдагдуулж, бусдын мөнгө угаах хэрэгсэл болгон, хар зах мэт ажиллуулж байгаа Монголбанкны удирдлагад хариуцлага тооцохгүй байгааг хаа хаанаа гайхаж байна.