Интерполоор эрэн сурвалжлагдаж байгаа Б.Энэбиш ярилцлага өглөө

  “Эрдэнэс Тавантолгой” компанийн гүйцэтгэх захирал асан Б.Энэбишийг эрх мэдлээ урвуулан ашиглаж, 1.6 тэрбум төгрөгийн үнэ бүхий арван ширхэг самосвал машин, чанарын шаардлага хангахгүй дугуй зэргийг “Эрдэнэс Тавантолгой” компанид худалдан авсан хэрэгт буруутган АТГ-т эрүүгийн хэрэг үүсгэн шалгаж байсан.  Гэвч тэрбээр гадагшаа гарсан учир интерполоор хайлгаж, хэргийг нь түр түдгэлзүүлээд байгаа. Тэгвэл интерполоор эрэн сурвалжлагдаж байгаа Б.Энэбиш “Үндэсний шуудан” сонинд ярилцлага өгсөн байна.

Тэрбээр ярилцлагандаа “Таван толгой ордыг ном журмын дагуу биечлэн эхлүүлж эргэлтэд оруулж, Монголын талд харьцангуй сайн гэрээ байгуулсаны үндсэн дээр Монгол Улсын иргэдэд байгалийн баялгаасаа эхний ээлжинд хүртэх мөнгө олж өгсөн. Энэ нь одоо гэмт хэрэг үү, харин ч эсрэгээрээ ажил үүргээ сайн биелүүлсний төлөө сайшаамаар зүйл биш үү. Дэлхийн төвшинд ирээдүйд хүрэх уурхайг алдаа мадаггүй нарийн бэлтгэн тооцож, олон талын дарамт хүчин зүйлийн дор өөрийн туршлага , мэдлэгтээ тулгуурлан нэг баг болсон залуус, хамт олонтойгоо нойр хоолгүй ажиллан эхлүүлж, үйл ажиллагааг нь жигдрүүлж өгсөн нь буруу юу, энэ гэмт хэрэг үү, эсвэл сайн ажил үйлс үү. Энэ ер нь шударга байна уу, парадокс байгаа биз. Би ажлаа өгсөнийхөө дараа 2013 оны нэгдүгээр сард зарим эмчилгээ, олон жил ачаалалтай ажилласан тул жаахан амралт болгож, гол нь ар гэрийн ажлаар гадаад орнууд руу явсан байсан юм. Намайг гадаад явсанаас хойш дөрвөн сарын дараа буюу АТГ-ын комиссарын зарласнаар 2013 оны тавдугаар сард надаар овоглосон асуудал гээд яриад эхэлсэн байсан” гэв.

mongolcomments