Монголын анхны ДОХ-той эмэгтэй ДОХ-ын вирус тээгч гадаад эртэй ханилж охинтой болжээ

Зах зээлд дөнгөж шилжиж байсан Монгол улсад  залилан хийж, охид хүүхнүүдтэй зугаацаж, нэг бүсгүйд хэзээ ч эдгэршгүй өвчин, сэтгэлийн шарх үлдээсэн Камеруны хоёр иргэн Монголчуудад ч бас том сургамж өгөөд явсан гэхэд болно. Энэ хэргээс хойш Монголын төр ДОХ гэдэг өвчин хэнд ч хэзээ ч тусаж мэдэх юм байна гэдгийг багахан ч гэсэн ухаарч, ДОХ-ын эсрэг сан байгуулж, гадаадын тусламж дэмжлэг авч, иргэдийнхээ эрүүл мэндэд бага ч гэсэн анхаарч эхэлсэн. Тэгвэл Монголд хамгийн анх ДОХ туссан гэж бүртгүүлсэн энэ бүсгүй өдгөө эрүүл саруул аж төрж байна.

Тэрээр ДОХ-ын халдвар авах үедээ хүүтэйгээ, ээжтэйгээ хамт амьдардаг байсан. “Хүүгээ жаахан ч гэсэн том болгохчих юмсан. Ядаж 35 хүртлээ амьдарчих юмсан гэж ярьж байсан бүсгүй ямартай ч энэ мөрөөдлөө биелүүлжээ. Тэрээр ДОХ-ын эсрэг Глобал сантай хамтран ажиллаж, ДОХ-ын эсрэг сургалт сурталчилгааны ажилд оролцож байгаад хэдэн жилийн өмнө Канад явсан гэнэ. Канадад өөртэйгээ адилхан ДОХ-ын вирусаар халдварласан Африк гаралтай залуутай танилцан, хайр сэтгэлийн холбоотой болж, охинтой болсон гэнэ. Хэдийгээр аав, ээж хоёр нь хоёулаа ДОХ-ын халдвар тээгч байсан ч гэсэн охин эрүүл саруул төрж, эцэг эхээ баярлуулжээ.

Канадад ДОХ-ын халдвар тээгчдэд байнга тэтгэмж өгдөг, эмээр үнэгүй хангадаг байсан ч оршин суух зөвшөөрөлийнх нь хугацаа дуусаж, эх орондоо ирээд байгаа аж. Харамсалтай нь монголд түүнийг тийм ч таатай угтаж авсангүй. ДОХ туссан учраас хөдөлмөрийн чадвараа 90 хувь алдсан хэмээн группт оруулжээ. Өөрийн гэсэн орон байргүй энэ бүсгүй УИХ-ын гишүүн Г.Уянгатай хүртэл уулзаж, гэр олгох хүсэлт гаргасан ч бас л хүлээж аваагүй гэнэ.

shudarga.mn