Германы канцлер Монголыг Хятадад “нэгтгэчихжээ”

Хятад улсын дарга Си Зиньпин Европын орнуудад айлчлал хийж байгаа билээ. Түүнийг Германд айлчлах үеэр Германы канцлер Ангела Меркель нэгэн өвөрмөц бэлэг бэлэглэсэн нь хятадуудыг ихэд баярлуулсан аж.

Гуравдугаар сарын 28-нд Меркель нөхрийн хамт Хятадын коммунист удирдагчийг дээд хэмжээнд ихэд хүндэтгэн хүлээн авсан аж. Хоёр тал бэлэг солилцоход Си эртний ваар, эхнэр нь Хятадын ардын дуутай СД бэлэглэсэн бол харин Меркель Германд 1735 онд бүтээсэн гэх “Хятадын анхны газар зүйн карт”  бэлэглэж гайхуулсан гэнэ. Хонконгийн хэвлэлүүд бичсэнээр тэр картанд Монгол, Оросоос эхлэн Азийн бараг ихэнх орныг Хятадад багтаан зурсан байсан байна. Энэ мэдээ Хятадын цахим ертөнцөөр цахилгаан адил хурдан тархаж, газар нутгаа эргүүлэн авья гэсэн эх оронч үзлийг нь дэврээгээд байгаа гэнэ. Уг нь 1735 онд Хятад өөрөө Манжийн Чин гүрний мэдэлд байсан юм.Хятадын блогчид Меркелийг үнэхээр сайхан бэлэг өглөө хэмээн баярлаж, энэ карт ямар ч үг хэл, сонин нийтлэлээс илүү бүхнийг хэлж байна гэж талархаж байгаа аж.

Ингээд Хятадын блогчдын сэтгэгдлийг сонирхуулья.

“Орос улс Крымийг эргүүлэн авснаар бидэнд газар нутгаа яаж эргүүлэн авдаг талаар сайхан хичээл зааж өглөө”

“Чин гүрний үед Монгол, Орос, Алс Дорнод бүгд манайх байсан. Хятадын газар нутаг сүүлийн үед их багасссан”

“Германуудын өгсөн энэ бэлэг бидний дайсан хэн бэ гэдгийг харуулж өглөө”

“Бид бараг 100 жил империалистуудтай тэмцэж байна. Гэтэл манай нутгийг харгис муу империалистууд эзлээд байгаа хэрэг биш байна”

“Энэ карт бол үнэлж баршгүй эрдэнэ. Маш гүн гүнзгий утгатай бэлэг байна”

“Энэ картанд манай хойд хэсгийн нутгуудыг заагаад өгсөн байна”

“Орос бидний нутгаас хамгийн ихийг авсан гэдгийг шууд хэлсэн бэлэг байна”

“Манай удирдагчид энэ картыг одоогийнхтой харьцуулж хараад Хятад орон ямар жижигхэн болсныг ойлгоосой. Ойлгоод ичээсэй”