Иргэд шар усны үерийн аюулаас сэрэмжлэхийг анхаарууллаа

Шар усны үерийн аюулаас урьдчилан сэргийлэх арга хэмжээг эрчимжүүлэх тухай Нийслэлийн Засаг даргын захирамж гарлаа.

Захирамжид цаг агаар дулаарч буйтай холбогдуулан гол горхи, цөөрмийн мөсөн дээгүүр тээврийн хэрэгслээр зорчих, мал туух зэргээс болж мөс цөмөрч хүний амь нас, эд материалын хохирол учрах эрсдэлтэйг иргэдэд сэрэмжлүүлэх, хориглосон газарт тэмдэгжүүлэлт хийж, хүн хүч машин тоног төхөөрөмжийг болзошгүй аюул учирсан үед бэлэн байлган, шуурхай арга хэмжээ авч ажиллахыг Нийслэлийн Онцгой байдлын газарт үүрэг болгосон байна.

Мөн үерийн хамгаалалтын барилга байгууламж, ус хуримтлагддаг гуу жалга, ус нэвтрүүлэх хоолойд хуримтлагдсан ахуйн гаралтай хог хаягдал, цас мөсийг тухайн дүүргийн оршин суугчдын оролцоотойгоор цэвэрлэх, найдвартай ажиллагааг алдагдуулж буй аж ахуйн нэгжийн үйл ажиллагааг зогсоох, газар чөлөөлөх, арга хэмжээ авч ажиллахыг холбогдох байгууллагуудад үүрэг болголоо.