ТҮЦ машинууд ажиллахгүй байна

Нийслэлийн иргэдийг хямд үнэтэй орон сууцаар хангах зорилготой Төрийн орон сууцны корпораци(ТОСК)-иас “Буянт-Ухаа-1″ хорооллыг барьж, ашиглалтад оруулахад бэлэн болгоод буй. Энэ хороололд нийтдээ 1764 айлын орон сууц сүндэрлэсэн. Баригдаж эхэлсэн цагаасаа иргэдийн сонирхлыг ихээр татаж, нэлээд хүлээлт үүсгэсэн “Буянт-Ухаа-1″ хорооллын байр захиалах хүсэлтэй иргэдийг өнгөрсөн даваа гарагаас эхлэн ТҮЦ машинаар бүртгэж эхлээд буй.

Энэ хүрээнд нийслэлийн хэмжээнд нийт 48 ТҮЦ машин ажиллаж байгаа ч ихээхэн ачаалалтай, очер, дараалалтай байгааг иргэд онцолж байсан юм.

Гэвч өнөөдөр өглөөнөөс тус ТҮЦ машинуудын ажиллагаанд доголдол гарсан бололтой дэлгэц дээр нь “УБЕГ-ын системд гэмтэл гарсан тул бүх ТҮЦ машинууд түр ажиллахгүй, 99001670 тодруулна уу” гэсэн анхааруулга байв. Энэ тухай дээрх утсаар тодруулах гэсэн боловч холбогдох боломжгүй гэсэн хариуг өглөө.

Ямартай ч ийнхүү хурдан, шуурхай найдвартай хэмээн мэдэгдээд байсан ТҮЦ машинд доголдол гарсан учраас үйл ажиллагаа нь хэвийн үргэлжлэх мэдээлэл гарах хүртэл цагаа алдан ТҮЦ машиныг зорихгүй байхыг иргэддээ сануулъя.

Г.Даша