“Алтайн хүдэр” компанийн олборлолт явуулах эрхийг хасна гэв

“Алтайн хүдэр” компани нь Говь-Алтай аймгийн Цээл суманд хүдэр олборлолт явуулаад өдгөө таван жилийн нүүрийг үзэж байна. Анх олборлолт явуулж эхлэхдээ өөрсдийн байгууламжаас Таян нуурын уурхай хүртлэх 183 км замыг хатуу хучилттай зам болгоно хэмээн хэлж байсан. Гэвч хатуу хучилттай зам өнөөдрийг хүртэл ашиглалтанд ороогүй байгаа аж. Уг зам ашиглалтад ороогүйн улмаас “Алтайн хүдэр” компанийн ажилчид осолд орж, байгальд орчинд сөргөөр нөлөөлөх үзэгдэл жилээс жилд нэмэгдсээр байна.

Мөн сүүлийн үед иргэд “Алтай хүдэр” компанийн удирдлагууд иргэдийн тавьж байгаа шаардлагыг хүлээж авдаггүйн дээр ажилчдынхаа хөдөлмөр аюулгүй байдалд анхаарал хандуулдаггүй талаар шүүмжлэлтэй хандаж байгаа аж. Тиймээс Говь-Алтай аймгийн Засаг дарга О.Амгаланбаатар удирдамж гарган “Алтайн хүдэр” компанид аймгийн мэргэжлийн хяналт болоод цагдаа нараар ахлуулсан ажлын хэсэг гарган шалгалт явуулжээ. Үүний дараа аймгийн засаг дарга “Алтайн хүдэр” компанийг эхний ээлжинд 183 км замыг ашиглалтад оруулах шаардлага тавьсан байна. Хэрвээ уг шаардлагыг байгууллагын удирдлагууд хүлээж аваагүй тохиолдолд “Алтайн хүдэр” компанийн олборлолт явуулах эрхийг хасах хүртэл арга хэмжээ авахаар болжээ.