Хэдхэн хоногийн өмнө л гэхэд тэрээр ИНЕГ-ын дарга С.Буяндалайг хална гэж хөөсөн байх юм.  Зам тээврийн сайдын зөвлөлийн шуурхай хуралдааныхаа үеэр  сайд А.Гансүх ИНЕГ-ын дарга С.Буяндалайд  хандан “Чи ажлаа хийж чадахгүй байна. Чамтай хамтарч ажиллаж чадахгүй, чи гар” хэмээн хэлж, дээрх хуралдаанд суулгаагүй ажээ. Ийнхүү салбарын сайддаа хөөгдсөн С.Буяндалай өрөө тасалгаанд байгаа эд зүйлсээ нааш цааш нь зөөж, ажлаа хүлээлгэн өгөхөд бэлдсэн.
Сайдтан ганц С.Буяндалайг ч хөөсөн юм  биш Зам тээврийн яамныхаа нарийн мэргэжлийн боловсон хүчин болох хяналт шинжилгээ үнэлгээний газрын дарга Махбал, хуулийн хэлтсийн дарга Энхбаатар гээд тоочоод байвал нилээд урт нэрсийн жагсаалт гарна. Ажлаа мэддэг боловсон хүчнүүдээ толгой дарааллан халж оронд нь “төрийн албанд тэнцээгүй газрын дарга,  биеийн тамирын багш төрийн нарийн бичгийн дарга” гэх мэтчилэн сонин сонин дарга нарыг томилж яамаа эрээвэр хураавар болгож сууна. Засаг төрийнх нь шинэчлэх бодлого боловсрогдоод талдаа орж байхад яаман дотроо ч суудал, гүйдлээ олж амжаагүй сайд шинэчлэл хийж амжих уу.
Ажлаа мэддэг дарга нараа шахаанд оруулж өөрөөр нь өргөдлийг нь өгүүлж халдаг сонгодог аргатай гэдгийг онцлох хэрэгтэй.
Сайдтан өөрөө ажлаа мэдэхгүй дээрээс нь хувийн амбицаар ажилдаа ханддаг болохоор Зам, тээврийн сайд А.Гансүх байсхийгээд л хэл аманд орж,  баталгаатай ар тал болох Ерөнхий сайдыгаа байдалд оруулдаг. Ерөнхий сайд нь аргалж, чаргалах гэж толгойгоо ажиллуулж, чамгүй л их хүч гаргадаг. Гэвч түүнийг дагах шүүмжлэл, хэл ам тасардаггүй. Даварсан А.Ганхуяг сайд цээжээрээ хамгаалдаг сайдынхаа сайхан сэтгэл рүү ус цацаж, түүнийг үл тоон Төсвийн байнгын хорооны хуралдаанд шууд л яамныхаа төсвийг нэмэх асуудлыг оруулсан. Энэ нь ч араасаа асуудал дагуулж, өөрийг нь хүн гэж тоогоогүйд дургүйцсэн Н.Алтанхуяг сайд сэтгүүлчдийн өмнө арга хэмжээ авна. Ямар арга хэмжээ авахыг судлуулж буйгаа мэдээлж байсан юм. Гэхдээ сайдын хувьд 30 хувьдуулаад л өнгөрсөн байсан. А.Ганхуяг сайд хэл ам татлаж дураараа авирладаг. Дээрээс нь ажлаа мэдэхгүй  гээд сайдын албан тушаалд нийцэхгүй шалтаг шалтгаан олон бий. Намын томилгоогоор хаа хамаагүй хуульч хүнээр зам тээврийн салбараа удирдуулсны балаг яамныхны толгойны өвчин болоод байгаа гэнэ.Харин сүүлийн үед Засгийн газарт байнга л хэл ам татлаж, ажлаа хийж чадахгүй байгаа зарим нэгэн гишүүдээ “зайлуулах” тухай яриа Төрийн ордон дотор “хэсэж явна” билээ. Зарим нэгийнх нь нэр нь ч тодорчихсон бололтой юм. Ямартай ч эхний ээлжинд Эрүүл мэндийн сайд Н.Удвал, Зам, тээврийн сайд А.Гансүх, Эдийн засгийн хөгжлийн сайд Н.Батбаяр нарын нэр дуулдаж байсан.  Н.Удвалын хувьд элчин сайдаар явах санал хүртэл хэлсэн талаар хэвлэлд бичсэн байсан. Харин мань хүн АНУ-д л элчингээр очвол очно, үгүй бол үгүй гэсэн хатуу байр суурьтай байгаа юм байх.

А.Номин