МАХН яагаад уугуул намдаа ханд хаяад байна

МАХН-аас МАН-ын дарга М.Энхболдод шаардлага хүргүүлсэн тухай мэдээлэл цахим ертөнцөд байна. Шуудхан хэлэхэд шаардлага гэхээсээ илүүтэй уугуул намдаа ханд хаясан нь илт харагдана лээ. Уг шаардлагад МАН МАХН-ын нэр хүндэд бүдүүлгээр халдаж, мөн намын нэр барьсан явуургүй хүмүүс хөлсний этгээдүүдийн явуургүй үйл ажиллагааг өөгшүүлж байгаад дургүйцлээ илэрхийлж, М.Энхболд даргад шаардлага хүргүүлэх болсон тухайгаа дэлгэрэнгүй дурдажээ.

Уг нь МАХН гэж ямар нам байхав дээ. Өөрсдөө МАН хэмээх их айлаас хууль бусаар өрх тусгаарлаж, бууриа зассан хэдэн урваачин шарваачид л байгаа шүү дээ. Нөгөө талаар хэсэг гомдогсод, гологдогсод гээд эрээвэр хураавар нөхдүүд л нам болж тоглож байгаа гэдгээ мэддэггүй бололтой.

Хүргүүлсэн шаардлагын эхний хэсэгт “МАХН-аас гарч танай намд ил далд хүчин зүтгэх болсон Н.Ганзориг, Б.Цэрэндорж, Г.Баярсайхан нар МАХН-ын үйл ажиллагааг зогсоох, татан буулгах тухай үл бүтэх атгаг санаа агуулан Улсын дээд шүүхэд нэхэмжлэл гаргаж хүргүүлсэн нь танай Монгол Ардын Намаас зохион байгуулалттайгаар турхиран өрсөлдөгч намынхаа нэр хүндэд халдсан эрээ цээргүй үйлдэл гэж үзэх бүрэн үндэстэй юм” гэсэн нь инээд хүргэнэ. Өөрсдөө яг энэ замаар л уугуул намаасаа гарч МАХН хэмээх намыг бараадсанаа өнөөдөр мартдаг бололтой.

Тухайлбал, өнгөрөгч 2012 оны УИХ-ын сонгуулиар тойроггүй үлдсэн Ч.Улаан сандрахдаа МАХН-ыг бараадсан бол мөн л тойроггүй болсон Д.Тэрбишдагва МАХН-ыг бараадсан. Дараагийн эгнээнд баахан гомдол тээсэн нөхөд азаа үзэж энэ намыг бараадсан нь санамсаргүй нөхцлийг бүрдүүлсэн шүү дээ. Гэхдээ энэхүү шаардлагыг хэний захиалгаар, юуны тулд нийтлүүлэв гэдэг нь өөрөө сонирхол татна. Магадгүй, далайн чанад бурхан номын мөр хөөж байгаа гэх Н.Энхбаяр даргынх нь захиалга ч байж болно. Нөгөө талаар МАХН айсуй 2016 оны сонгуульд суудал авахгүй гэдгээ эрт мэдсэн учраас ийнхүү уугуул намдаа ханд хаяж байгаа хэлбэр байж болно. Мөн тун удахгүй унах Н.Алтанхуягийн Засгийн газраас туугдахдаа тулж байгаа учраас арга барсан энэ мэт ажлыг хийж байгаа бололтой юм. Энэ мэтчилэн хэсэг намдаа гологдож, ад үзэгдсэн нөхдүүд Н.Энхбаярыг царайчилж очсоноос өөр юу байгаа юм. Тэгэхээр хүргүүлсэн шаардлыг дор сийрүүлэхээр энэ тухай бүр ч тод харагдах болно.

Нэгдүгээрт
Монгол Улсын Дээд шүүхэд бүртгэлтэй улс төрийн намын үйл ажиллагаанд  өөр нам, улс төрийн хүчин хөндлөнгөөс оролцох нь хууль зөрчсөн ажиллагаа мөн. МАХН бол Улсын дээд шүүхэд бүртгэлтэй Монгол Улсын хуулийн дагуу бүхий л үйл ажиллагаагаа явуулж байгаа улс төрийн нам билээ. МАХН-аас гарч танай намд ил далд хүчин зүтгэх болсон Н.Ганзориг, Б.Цэрэндорж, Г.Баярсайхан нар МАХН-ын үйл ажиллагааг зогсоох, татан буулгах тухай үл бүтэх атгаг санаа агуулан Улсын дээд шүүхэд нэхэмжлэл гаргаж хүргүүлсэн нь танай Монгол Ардын Намаас зохион байгуулалттайгаар турхиран өрсөлдөгч намынхаа нэр хүндэд халдсан эрээ цээргүй үйлдэл гэж үзэх бүрэн үндэстэй юм. Дээр дурьдсан нэр бүхий ашиг хонжоо хайгчид бол нэгэн цагт МАХН-ын гишүүн байснаа 2013 оны Ерөнхийлөгчийн сонгуулийн үеэр МАН-аас нэр дэвшигчийг дэмжинэ гэдгээ мэдэгдэж салж явсан бөгөөд Улс төрийн намын тухай хууль болон МАХН-ын дүрмэнд заасан ёсоор “… Тухайн намын үзэл бодлыг дагахгүй, хүлээн зөвшөөрөхгүй…” гэдгээ мэдэгдсэн тул дээрх иргэд МАХН-аас албан ёсоор гарч, энэ намд гишүүнчлэлгүй болж, арга буюу МАН-ын хаяа бараадсан урвагчид гэдгийг олон нийт сайн мэднэ.

Хоёрдугаарт
МАХН-ын үйл ажиллагааг харлуулах өчүүхэн санаатай танай намын зарим удирдлага Говь-Алтай аймагт болсон дахин сонгуульд хуулийн дагуу шударгаар өрсөлдөх бус, харин “үр могойгоо алах гэж”  оролцож явна гэх ухуулга сурталчилгаа хийсэн нь дээр нэр дурьдсан өөрийн бодолгүй хүмүүсийн “МАН-ын саналыг хувааж болохгүй” гэсэн уриатай утга ижил бөгөөд өчүүхэн хүмүүсийн улс төрийн бохир өдөөн хатгалга, ил тодоор өдөөн турхирсан үйлдэл гэдэг нь хэнд ч ойлгомжтой байгаа юм. Энэхүү зохион байгуулалттай үйл ажиллагаа нь МАХН-ын гишүүдийн болон 2012 оны сонгуулиар МАХН-ын төлөө саналаа өгсөн 250 гаруй мянган сонгогчдын эрх ашгийг бүдүүлгээр зөрчиж байгааг танд сануулая. Түүнчлэн үзэл бодол, итгэл үнэмшлээ худалдсан урван шарвагчдаар дамжуулан ард иргэдэд буруу, сөрөг мэдээлэл өгөх гэсэн нь илтэд хоцрогдсон бохир арга барил тул таныг өөрийн үйл ажиллагаандаа дүгнэлт хийж, МАХН-ын үйл ажиллагаанд хөндлөнгөөс бүдүүлгээр нөлөөлөхийг оролдох үйлдлээ таслан зогсоохыг шаардаж байна.

Гуравдугаарт
МАХН-ын гишүүд бидний тавьсан шаардлагыг үл огоорч, цаашид МАН-ын зүгээс болон хөлсний этгээдүүд ашиглан манай намын нэр хүндэд халдсан бохир оролдлогоо үргэлжлүүлэх аваас хуулийн байгууллагад хандан таны болон танай намын удирдлагуудын хууль бус,бусармаг үйл ажиллагааг илчлэн тэмцэх болно гэдгийг хариуцлагатайгаар мэдэгдэж байна гэсн гурван үндсэн шаардлагыг хүргүүлжээ.

А.Гал