“ХААН” банкны теллерүүд халамжийн мөнгө идэлцсэн үү?

Сайн зүйлд нэр нь огт бичигдэхээ больсон “Хаан” банкны асуудал газар сайгүй өрнөсөөр. Үүний нэг нь Баян-Өлгий аймаг дахь ХААН банкинд гарсан үйл явдлаар гэрчлэгдэнэ. Учир нь, Баян-Өлгий аймагт Казахстаны иргэншил сольсон хүмүүст нэг удаа тэтгэмж болгож төрөөс 700 мянган төгрөгийн тусламж үзүүлдэг болжээ. Энэ мөнгөнөөс тус аймгийн Нийгмийн халамжийн хэлтсийнхэн завшсан нь тодорхой болж, энэ асуудалд тус аймаг дахь “Хаан” банкны теллерүүд оролцсон хэмээн шалгагдаж эхэлжээ.

Иргэншил сольсоны буюу квотын мөнгө идсэн гэх энэ хэрэгт нийтдээ 17 хүн сэжиглэгдэж байгаагийн дөрөв нь “ХААН” банкны теллер бөгөөд бусад нь Нийгмийн халамж, үйлчилгээний газрын ажилтнууд гэнэ. Одоогоор энэ хэргийг Улсын мөрдөн байцаах газрын дөрөвдүгээр хэлтэст эрүү үүсгэн шалгаж эхлээд байгаа юм байна.

Хамгийн гол нь, Монгол Улсын иргэний бүртгэлээс хасагдаж байгаа иргэдийн баримт материалыг бүрдүүлэн санхүүгийн луйвар хийсэн энэ хэргийн цаана нэлээд их хэмжээний мөнгө яригдаж байгаа юм байна. Одоогоор мөнгөн дүн нь тодорхойгүй байгаа юм. Өмнө нь тэтгэврийн мөнгийг аймаг орон нутагт банк, халамжийнхан хамтран идэж шүүхээр шийтгүүлэн ял авсан тохиолдол цөөнгүй байдаг.

Харин Баян-Өлгий аймагт өрнөөд буй иргэншлийн тэтгэмжийн асуудал хэдэн жилийн өмнөөс яригдаж, хуурамч бичиг баримт бүрдүүлэн Монгол Улсын иргэншлээс хасагдахгүй хэрнээ мөнгө аваад байгаа нь сөхөгдөж байсан ч энэ удаа ийнхүү баримттайгаар илэрч буй бололтой. Хэрэгт холбоотой дарга нар бусад ажилтнууд одоогоор хорионд байгаа мэдээлэл байна. Эх сурвалж www.wikimon.mn