Хоригдлуудын хийсэн гар урлалыг онлайнаар худалдана

 ШШГЕГ-ын харьяа хорих ангиудад ял эдэлж буй хүмүүжигчдийн хийсэн гар урлал, арьсан эдлэл зэргийг онлайнаар худалдаж, учруулсан хохирлыг барагдуулахаар болсон байна.

ШШГЕГ-аас эрх зүйн шинэтгэлийн хүрээнд хүмүүжигчдийг хөдөлмөр эрхлүүлж хөдөлмөрийн хөлсийг учруулсан хохирлыг барагдуулахад суутгадаг бөгөөд  хүмүүжигчдийг хорих ангийн гадна барилгын ажилд болон барилгын материалын үйлдвэрлэл, хувь хүн албан байгууллагуудтай гэрээгээр, хорих ангийн үйлдвэрийн бүсэд мод модон материал, чулуун эдлэл, газар тариалан, мал аж ахуй, үйлчилгээнд ажиллуулж хуулийн дагуу хөдөлмөрийн хөлс олгодог ажээ.

Өнгөрсөн жил тус газраас нийт 5581 хүмүүжигчийг ажлын байраар хангаж, 1 тэрбум 117 сая төгрөгийн цалин өгснөөс хохирол барагдуулахаар 156 сая төгрөг суутган хохирогчид шилжүүлсэн бол энэ онд ийнхүү хүмүүжигчдийн хийсэн гар урлалыг худалдаалах шинэ ажлыг эхлүүлж байгаа юм байна.

Түүнчлэн хүмүүжигчдийг гар урлал буюу сийлбэр, хайчилбар, уран зураг, уран дарханы сургалтад хамруулдаг бөгөөд хоригдогчдын хийсэн гар урлал зэргийг худалдах үзэсгэлэнгийн сайт нээхээр төлөвлөжээ.