Азийн шилдэг дасгалжуулагчаар Д.Ганзориг тодров

Азийн сонирхогчдын боксын холбооноос өнгөрсөн  ням гарагт Монголын олимпийн боксын холбоонд Монгол Улсын боксын Үндэсний шигшээ багийн ахлах дасгалжуулагч, Монгол Улсын гавьяат дасгалжуулагч Дашзэвэгийн Ганзоригийг 2013 оны “Ази тивийн шилдэг дасгалжуулагч”-аар тодорсон тухай таатай мэдээг сонордуулжээ.

Тэрбээр 1997 оноос эхлэн боксын дасгалжуулагчаар ажиллаж байгаа бөгөөд улиран одож буй 2013 оны туршид баг тамирчдаа удирдан олон улсын тэмцээнд амжилттай оролцсоныг ийнхүү үнэлжээ. Монгол Улсын Хөдөлмөрийн баатар, Бээжингийн олимпийн аварга, ДАШТ-ий мөнгөн медальт, гавьяат тамирчин Э.Бадар-Ууган, Хөдөлмөрийн баатар, Бээжингийн олимпийн мөнгөн медальт, Дэлхийн аварга П.Сэрдамба тэргүүтэй олон шилдэг боксчдыг төрүүлсэн шилдэг дасгалжуулагч гэдгийг монголчууд төдийгүй олон улс орны бокс сонирхогчид андахгүй мэддэг болжээ.

Монголын боксчид өндөр амжилт гаргаж, амжилтын буухиа тасрахгүй байгаад Д.Ганзориг багшийн хувь нэмэр, хөдөлмөр зүтгэл оролцсон гэдгийг МОБХ-ноос онцолж байв. Азийн сонирхогчдын боксын холбооноос түүний хөдөлмөрийг үнэлж оны шилдгээр тодруулан 16 жил боксын спортын төлөө хийсэн амжилт, ололтыг нь тивийн хэмжээнд баталгаажууллаа.

Д.Өлзий