А.Гитлерын армийг эмэгтэй хүн удирдахаар болжээ
ХБНГУ түүхэндээ анх удаа эмэгтэй хүнээр Батлан хамгаалах яамаа удирдуулахаар болжээ. Хөдөлмөрийн сайд асан Урсула фон дер Ляйен уг албыг хашихаар болсон байна. Үүний зэрэгцээ ХБНГУ-ын дэд канцлер, Гадаад хэргийн сайдаар Социал демократ намын дарга Франк-Вальтер Штайнмайерыг томилжээ.
Германы канцлер А.Меркель өнгөрсөн намар болсон сонгуулиар гурав дахь удаагаа албан тушаалаа хаших болсон бөгөөд тэрээр шинэ эвсэл байгуулахаа мэдэгдсэн удаатай. Уг эвсэл нь Социал демократ нам, Христийн ардчилсан нам, Христийн социал холбооноос бүрдэж буй. А.Меркелийн нам сонгуулиар ялалт байгуулсан ч олонхийн суудал авч чадаагүй билээ.
Харин шинээр байгуулсан эвсэл парламентын 631 суудлын 504-ийг аваад байгаа юм. Эвслийн дотор болсон хэлэлцээгээр Социал демократуудаас зургаа, Христийн ардчилсан холбооноос тав, Христийн социал холбооноос гурван гишүүн Сайд нарын танхимын бүрэлдэхүүнд багтах гэнэ. Гурав дахь удаагаа сонгогдсон ХБНГУ-ын Канцлер А.Меркель, Гадаад хэргийн сайдаар 2005-2009 онд ажиллаж байсан хатагтай Франк-Вальтер Штанмайер нар өнөөдөр албан ёсоор үүрэгт ажилдаа орох юм.
Харин одоогийн Батлан хамгаалахын сайд Томас де Мезьер Дотоод яамыг удирдахаар болж байгаа юм байна. Батлан хамгаалахын шинэ сайд Урсула фон дер Ляйен эмч мэргэжилтэй. Гадаад хэргийн сайдаар томилогдсон Франк-Вальтер Штайнмайерын хувьд А.Меркелийг засгийн эрхийг удирдах болсон цагаас орлогч сайд болон Эдийн засаг, эрчим хүчний сайдын албыг хашиж байжээ.
эх сурвалж: eagle.mn
URL:
