Онцгой албан татварыг төгрөгөөр тооцох талаар судалж байна

Санхүүгийн зохицуулах хорооноос аж ахуйн нэгж, төрийн зарим байгууллагад Төлбөр тооцоог үндэсний мөнгөн тэмдэгтээр гүйцэтгэх тухай хуулийг хэрэгжүүлж буй байдалд шалгалт хийжээ.

Шалгалтаар 14 байгууллагад зөрчил илэрч, 134 сая төгрөгийн торгууль ногдуулсан байна. СЗХ-ны зүгээс дээрх хуулийг хэрэгжүүлэх эрх зүйн орчинг сайжруулах ажлын хүрээнд Ашигт малтмалын тухай, Гаалийн онцгой албан татварын тухай хуулиудад татвар, хураамжийн хэмжээг төгрөгөөр илэрхийлэх өөрчлөлт оруулах, төсөвт төлөх аливаа төлбөр тооцоог зөвхөн төгрөгөөр төвлөрүүлэх зохион байгуулалтын арга хэмжээ авахаар Санхүүгийн тогтвортой байдлын зөвлөл, Сангийн яамтай хамтран ажиллаж байна.

Жилд ашигт малтмалын тусгай зөвшөөрлийн хураамжид 40 сая ам.доллар, гаалийн онцгой албан татварт 140 сая ам.доллартай тэнцэх татвар хураамж ногдуулдаг байна. Мөн түүнчлэн аж ахуйн нэгжүүд бараа үйлчилгээнийхээ үнэ, тариф, төлбөр тооцоог гадаад валютаар илэрхийлэн гүйцэтгэхэд нөлөөлж буй гол хүчин зүйлд арилжааны банкуудын гадаад валютын зээл олгох сонирхол нөлөөлдөг байна.

Арилжааны банкууд эхний арван сарын байдлаар гурван тэрбум ам.долларын зээл олгожээ. Иймд гадаад валютын зээлийн зориулалтыг зохицуулах бодлого хэрэгжүүлэх саналыг Монголбанкинд хүргүүлээд байна.

Ж.Цогзолмаа

ЗУУНЫ МЭДЭЭ