Нас барсан баячуудын жагсаалтыг Майкл Жексон тэргүүлжээ

Эзэн нь ертөнцийн мөнх бусыг үзүүлсэн ч зохиогчийн эрх, патент болон бусад өмч нь үр хүүхэд, гэр бүлийнхэнд нь орлого оруулсаар байдаг.

Тэгвэл Forbes сэтгүүл энэ онд хамгийн их ашиг орлого олсон нас барсан алдартай хүмүүсийг жагсаажээ. Жагсаалтыг “Попын хаан” Майкл Жексон тэргүүлсэн байна. Тэрбээр 2012 оны аравдугаар сараас энэ оны аравдугаар cap хүртэл 160 сая ам.долларын ашиг олжээ. Хоёрдугаарт Элвис Пресли 55 сая ам.долларын орлогоор бичигджээ.

Гуравдугаарт Снүүпи нохойг зурсан Чарльз Монро Шульц орсон байна. Тэрбээр комик номныхоо эрхээс 37 сая ам.долларыг өөрийн болгожээ. Өнгөрсөн жил энэ жагсаалтыг тэргүүлж байсан Элизабет Тейлор энэ жил 25 сая ам.доллар дөрөвт жагсжээ.

Түүний араас хөгжимчин Боб Марли 18 сая, жүжигчин Мэрилин Монро 15 сая, хөгжимчин Жон Леннон 12 сая, эрдэмтэн Альберт Эйнштейн, фотомодель Бетти Пейж 10 сая, хүүхдийн үлгэрийн зохиолч Теодор. Гейзель 9 сая, жүжигчин Стив Маккуин 9 сая, жүжигчин Брюс Ли, дуучин Женни Ривера 7 сая ам.долароор орсон байна. /НИЙГМИЙН ТОЛЬ/