Хакухогийн нэрэмжит хүүхдийн сумо бөхийн тэмцээн болно

“Эрүүл монгол хүүхэд” уриатайгаар зохион байгуулагдаж байгаа өсвөрийн аварга  шалгаруулах сумо бөхийн тэмцээн энэ сарын 27-ны өдөр МҮЭСТО-д болно.

Дөрөв дэх жилдээ уламжлагдан зохиогдож байгаа тус тэмцээний зорилго нь Монгол сумочдынхоо галыг таслахгүй, сумогийн дэвжээг эзэгнэхээр төрсөн өсвөрийн тамирчдаа бэлдэн сургахад оршиж байгаа юм.

Өсвөрийн сумо бөхийн аварга шалгаруулах тэмцээний шигшээ 8-д шалгарсан сумочдоос 5 хүүхдийг шалгаруулан авч тусгайлан бэлтгэлд хамруулан ирэх 12 дугаар сард Японы нийслэл Токио хотноо болох Хаку Кап олон улсын тэмцээнд оролцуулах юм байна.

Улаанбаатар хотын дүүрэг тус бүрийн ерөнхий боловсролын сургуулиудаас гадна хөдөө орон нутгаас сумо бөхөөр сонирхон хичээллэдэг хүүхэд залуучууд хүрэлцэн ирэх боломжтой юм байна.
Нийтдээ  3 насны ангилалд хүч сорин өрсөлдөх өсвөрийн сумочдын тулааныг ТВ9 телевиз бүрэн ихээр нь уншигч та бүхэндээ хүргэх юм байна.

Тэмцээний бүртгэл 25ны өдрийг дуустал Их шавь дээд сургуулийн байранд болно.

Б.Баттунгалаг