“ГОК”-ийн хуулийн хэлтсийн дарга “Жаст”-ын хэрэгт орооцолджээ

Бусдын өмнөөс Монголын төр хариуцлага хүлээхээр болчихсон энэ цаг үед хэргийн эзэн, хэнгэргийн дохиур Ш.Батхүү хоригдсон гэх мэдээлэл цацагдаж байна. Тэрбээр Өмнөд Африкийн “Стандарт” банкнаас зээл авахдаа бусдын гарын үсгийг дууриалган хуурамчаар үйлдсэн болох нь нэгэнт тогтоогджээ.

Харин энэ хэрэгт хамааралтай хэд хэдэн хүмүүс холбогдон шалгагдах болсон юм. Ш.Батхүү “Би ганцаараа буруутай” хэмээн мэдүүлэг өгч байгаа, хэргийг ганцаараа үүрэхээр зүтгэж байгаа ч энэ хэрэгтэй холбоотой нэгэн эрхэм үүрэгт ажлаасаа чөлөөлөгджээ.

Тухайлбал, уулын баяжуулах “Эрдэнэт” үйлдвэрт шалгалт хийхэд тухайн шалгалтыг хуулийн хэлтсийн дарга И.Идэш бусад нөхдийн хамт шалгаж байжээ. И.Идэш гэгч нь Хууль зүйн сайд асан Ц.Мөнх-Оргилын хамт хуулийн фирм ажиллуулж байсан нэгэн учир түүнийг ийнхүү ашиг сонирхлын зөрчилтэй байж магадгүй хэмээн “Эрдэнэт”-ийн удирдлагууд үүрэгт ажлаас нь чөлөөлсөн байна. Өмнө нь хэвлэлийн хуудсаар “Жаст”-ын гэрээг Ц.Мөнх-Оргил хуулийн талаас нь хянаж байсан гэсэн мэдээлэл нийтлэгдэж байсан юм. Гэвч тэрбээр одоог хүртэл ямар нэгэн тайлбар хийгээгүй байгаа.

Одоогийн байдлаар Ш.Батхүүгийн хийсэн гэрээ нь манай улсын криминалистик шинжилгээгээр хуурамч гэдэг нь тогтоогдсон байна. Тиймээс эл хэргийн эцсийн шийдвэрийн үнэн, худлыг олон улсын Арбитрийн шүүх дэнслэх юм билээ. Тэгэхээр Ш.Батхүүгийн тарьсан балгаас болж хэдэн хүн ажил, амьдралаасаа салах бол гэдэг нь бас л асуудалтай зүйл. Мөн үүний ард томоохон улс төрчид, хуульчид гээд олон арван хүн татагдах, хамрах хүрээ нь томрох магадлалтай байна.