25-р эмийн сангийн урд уулзварыг түр хаалаа

Циркийн арын, 25-р эмийн сангийн урд уулзваруудыг өргөтгөн шинэчлэх ажил хийгдэж буйтай холбогдуулан түр хугацаанд замын зарим зорчих хэсгийг хаахаар болжээ.

Тодруулбал, өнөөдөр 10.00 цагаас маргааш 20.00 цаг хүртэл Циркийн арын уулзварын зорчих хэсгүүдийг түр хааж, суурь хучилтын ажлыг гүйцэтгэх юм байна.

Мөн өнөөдөр орой 23.00 цагаас 22-ны 20.00 цаг хүртэл 25-р эмийн сангийн урд уулзварт хойноос урагш чиглэлд нийлэх замын зорчих хэсгийг хааж, сэтэлгээ хийн инженерийн шугам сүлжээний ажил гүйцэтгэх аж.

Тиймээс зам түр хаах графикт хугацаанд тээврийн хэрэгслээр зорчигч та бүхэн нээлттэй замуудыг сонгож зорчихыг анхааруулж байна.

Б.Соёлмаа