Д.Ганхуяг сайд “Оюу толгой”-н шинэ ерөнхийлөгчтэй уулзав

Уул уурхайн сайд Д.Ганхуяг “Оюу толгой” компанийн гүйцэтгэх захирал Крэйг Киннелийг өөрийнх нь хүсэлтээр хүлээн авч уулзлаа.

Д.Ганхуяг сайд “Оюу толгой” төсөл дээр олон улсад нэр хүндтэй, дэлхийн хэмжээний хөрөнгө оруулагч компанитай хамтарч ажиллаж байгаадаа баяртай байгаагаа илэрхийлээд Монгол Улсын хууль тогтоомж, тэдгээрт нийцүүлэн гаргасан журмыг даган мөрдөж, нээлттэй, ил тод зарчмыг баримтлан ажиллахыг хүслээ.

“Оюу толгой” компанийн шинэ захирал Крэйг Киннел Монголчуудын соёл, ёс заншил, хууль дүрэм, хамтын гэрээгээ чанд баримтлан олон улсын хэмжээнд жишиг болохуйцаар хамтран ажиллахаа илэрхийлэв. Мөн тэрбээр аюулгүй уул уурхайн журмыг баримтлан, хариуцлагатай уул уурхайн зарчмыг дээдлэн ажиллахаа амлав.

Хоёр тал тулгамдаад буй асуудлуудыг зохих шатанд нь бүтээлчээр шуурхай шийдэх талаар хамтран ажиллахаар тогтлоо.

Б.Ирээдүй