ЗЭРЛЭГ ЦЭЦЭГСИЙН ХҮЛЭМЖ

“ЗЭРЛЭГ ЦЭЦЭГСИЙН ХҮЛЭМЖ” уран сайхны кино нээлт 2013.09.12,13-нд болох бөгөөд “Тэнгис”, “Өргөө” кино театруудад гарах гэж байна.

Энэхүү  киногоор хүн хүнээ хайрлах сэтгэл ямар хүчтэй болохыг харуулахыг зорьсон төдийгүй нийгмийн аль үед, ямар ч нөхцөл орчинд хүн чанар, хүнлэг сэтгэл хувирашгүй оршиж  байдгийг харуулж чадсанаараа онцлогтой. Киноны  үйл явдал 1980-аад онд өрнөх бөгөөд тухайн цаг үеийн нийгмийн  бурангуй  дүр зураг одоо хэр нь энэ цаг үед бугшисаар байгааг уран сайхны аргаар дэлгэн харуулж байгаагаараа анхдагч юм.

Киноны ерөнхий продюсер болон ерөнхий найруулагчаар МУГЖ У.Уранчимэг, киноны  зохиолыг  МУСТА, жүжигчин Д.Ганцэцэг бичиж, харин зургийн даргаар жүжигчин А.Ганчимэг нар  тус тус ажиллажээ.

Түүнчлэн киноны гол дүрд дээрхи гурван жүжигчнээс гадна БНСУ-ын Кино Урлагийн Дээд Сургуулийг жүжигчний мэргэжлээр төгссөн залуу уран бүтээлч Б.Энхтүвшин, МУГЖ Б.Тунгалаг, ҮДБЭЧ-ын бүжигчин МУСТА, М.Бямбаа нар тоглож, туслах дүрүүдэд МУАЖ,  Д.Мэндбаяр, МУГЖ Б.Тунгалаг, МУГЖ  Ж.Оюундарь, МУГЖ А.Алтан-Өлзий, МУСТА Ц.Төмөрхуяг, МУСТА Ж.Пүрэвдорж, МУСТА Г.Амгаланбаатар, МУСТА Алтансүх /Аси/, МУСТА Э.Батхүү, МУСТА А.Алтантөр,  КУДС-ийн жүжигчний 3-р курсын оюутан Ц.Мөнхболд нарын зэрэг 90 гаруй  уран бүтээлчид оролцон тоглосон байна.

“Зэрлэг цэцэгсийн хүлэмж” уран сайхны киноны дууны хөгжмийг МУУГЗ, хөгжмийн зохиолч Л.Балхжав, шүлгийг МУСТА, сэтгүүлч П.Одгэрэл зохиосон ба  дуурийн дуучин У.Уранцэцэг, дуучин Э.Агиймаа, Б.Маралжингоо  дуулсан юм.

Дашрамд дуулгахад уг кино нь “ХУВЬСАЛ” продакшны анхны дэлгэцийн бүтээл буюу уран сайхны кино юм. Харин киноны гол дүрийн жүжигчид бол МУГЖ У.Уранчимэг, МУСТА, жүжигчин Д.Ганцэцэг, залуу жүжигчин А.Ганчимэг нар “Хувьсал” продакшны албан ёсны жүжигчид  болсноо зарлалаа.

Х.Алтанзагас