Жолооны үнэмлэхийг гурван хоногийн дотор гаргаж өгнө гэв

Замын цагдаагийн газар жолооны үнэмлэхийг хэвийн үйлдвэрлэж эхэлсэн байна. ЗЦГ-т хуримтлагсан 70-80 мянган жолоочийн үнэмлэхийг хэвлэж, иргэдэд тараасан. Харин одоо ажиллаж байгаа хэвлэх машин нь 24 цаг зогсолтгүй ажиллаж, өдөрт 500-600 үнэмлэх хэвлэж байгаа гэж албаны хүн хэллээ.

Жолооч нар үнэмлэхээ гээсэн тохиолдолд ажлын гурван хоногт хэвлэж өгч байгаа гэнэ. Тиймээс иргэд шинэ үнэмлэхний үнэ 12500 төгрөг банкинд тушаасан баримт, цахим үнэмлэхний хуулбарын хамт ЗЦГ-ын Мэргэжил хяналтын хэлтэст хандах хэрэгтэй юм байна.

Харин хуучин үнэмлэхээ солиулаагүй байгаа иргэдийн хувьд санаа зоволтгүй байж болох аж. Заавал шинэ үнэмлэх авах ёстой гэсэн шаардлага тавихгүй байгаа юм байна. Иргэд өөрийн хүсэлтээр эсвэл автомашин жолоодох эрхээ түр түдгэлзүүлсэн тохиолдолд хуучин үнэмлэхийг нь устгаж, дахин жолооны үнэмлэх олгохдоо шинэ үнэмлэх өгч байгаа гэнэ.