Яарч тавьсан зам эхнээсээ эвдэрчээ
Д.БОЛОР
Нийслэлийн Сонгинохайрхан дүүргийн “22 товчоо”-ны зам дахин эвдэрчээ. Нийслэлийн Засаг даргын Тамгын газраас 1.3 тэрбум гаргаж байж наадмын өмнө ашиглалтад оруулсан ч өнгөрсөн өдрүүдэд орсон борооны улмаас эвдэрчээ. Энэ талаар Нийслэлийн Зам, тээвэр, дэд бүтцийн асуудал хариуцсан орлогч дарга Н.Гантөмөр өчигдөр Ерөнхий сайд Н.Алтанхуягт “Бүтээн байгуулалтын цаг”-аар учирлалаа. Харин зам тээвэр, барилгын салбарт бүтээн байгуулалт үргэлжилж байгааг албаныхан дуулгасан.
ЭНЭ ЖИЛ 1700 КМ ЗАМ АШИГЛАЛТАД ОРУУЛНА
Сайншанд Замын-Үүд чиглэлд баригдаж буй 120 км авто замын ажилтай өнгөрсөн долоо хоногт Зам тээврийн сайд А.Гансүх танилцсан байна. Гэрээний дагуу энэ замыг ирэх жил ашиглалтад оруулах байсан ч ирэх аравдугаар сарын 30-нд ашиглалтад оруулахаар болжээ. Энэ зам ашиглалтад орсноор нийслэлээс Замын-Үүд чиглэлд хатуу хучилттай замаар холбогдож байгаа юм байна. Чойроос Сайншанд чиглэлийн авто замыг мөн барьж байгаа бөгөөд ирэх пүрэв гаригт улсын комисс хүлээж авахаар товложээ. Шинэчлэлийн Засгийн газраас энэ жил зургаан аймгийг хатуу хучилттай замаар холбохоос энэ долоо хоногт Чойр-Сайншанд чиглэлийн авто зам ашиглалтад орох юм. Өнгөрсөн долоо хоногт Ерөнхий сайд Улаанбаатарыг Баянхонгор аймагтай холбосон замыг нээсэн. Харин удахгүй Дундговь, Дорнод, Хөвсгөлийн замыг дарааллаар нь ашиглалтад оруулахаар ажиллаж байгаа гэж А.Гансүх сайд онцолсон. Энэ жил улсын хэмжээнд нийт 2900 км замын ажил хийгдэж байгаагаас 1700 км замыг ашиглалтад оруулахаар ажиллаж байгаа юм байна.
ЗАМУУДЫГ ЭНЭ САРЫН 15-НД АШИГЛАЛТАД ӨГНӨ
Засгийн газраас аймгуудыг хот болгох, сумдыг шинэ сум болгох төслийг эхлүүлсэн. Үүний эхлэл болгож Баянхонгор аймгийг Бууцагаан, Баянлиг сумдыг “Шинэ сум” төслийн хүрээнд Канадын модон барилгажуулалт хийж байгаа. Төслийн хүрээнд дээрхи хоёр сум энэ сарын 20-нд ашиглалтад орох байсан ч цаг агаарын нөхцөл, Канадын модны нийлүүлэлт удаашралтай байсан учраас ирэх сарын 20-нд хүлээлгэн өгөхөөр ажиллаж байгаа гэв. Нийслэлийн авто замын түгжрэлийг бууруулах зорилгоор шинээр авто замын уулзваруудыг байгуулж, шинэчилж байгаа. Үүний хүрээнд өнгөрсөн долоо хоногт хоёр уулзварыг ашиглалтад оруулсан байна. Ингэснээр “Гудамж” төслийн хүрээнд 33 уулзвар ашиглалтад оруулахаас, тууз хайчилсан найм, бэлэн болсон 12 уулзвар байгаа гэдгийг танилцууллаа. Төв зам болон “Гермес” төв, “Бэгдү” хорооллын зам огтлолцдог Х хорооллын уулзвар, Гурвалжингийн гүүрний урд талын Ажилчны уулзваруудыг тус тус нээсэн байна. Мөн энэ долоо хоногт Бөхийн өргөө, III, IV хорооллын эцсийн уулзвар, Тасганы овооны уулзваруудыг нээхээр төлөвлөжээ. Нийслэлийн Засаг даргын Тамгын газраас хэрэгжүүлж буй зам засварын ажлыг энэ сарын 15-нд дуусгавар болгоно гэлээ.
ЗУУНЫ МЭДЭЭ
URL:
