T-ARA Монголд тоглолтоо хийнэ

Солонгостоо төдийгүй дэлхийн хөгжмийн ертөнцөд өөрийн гэсэн орон зайг эзэлж чадсан K-Pop хамтлагууд Монголд тоглолтоо хийхээр болжээ.

Тодруулбал, өсвөр насны охид, хөвгүүдийн “шүтээн” болсон гэж хэлж болохуйц Солонгосын “Core contents media” компанид харьяалагддаг “T-ARA”, “Davichi”, “Speed”, “Seeya” хамтлагууд “ETV” телевизийн урилгаар Улаанбаатар хотноо зочилж, тоглолтоо хийхээр болжээ.

Эдгээр хамтлагууд ирэх сарын 19-ний өдөр манай улсад ирэх бөгөөд 21-нд Төв цэнгэлдэх хүрээлэнд тоглолтоо хийх гэнэ.

Бэлтгэл ажлын хувьд 90 хувьтай байгаа бөгөөд тоглолтын зохион байгуулалт, хамгаалалтын хувьд дээд зэргийн байхаар ажиллаж буйгаа зохион байгуулагчдын зүгээс дуулгасан юм.

Тасалбарын хувьд суудлаасаа хамаарч 35 мянга, тусгай ангиллынх 60 мянга, VIP тасалбар 350 мянган төгрөгөөр худалдаалагдах юм байна.

Тасалбарыг наймдугаар сарын 26-наас худалдаанд гаргаж, “Ноён зууч”-ийн салбаруудаар болон “ETV” телевизийн байранд худалдах ажээ.

А.Сүрэн