“Барилга орон сууц-2013” намрын үзэсгэлэн яармаг болно

Барилгын Зөвлөгөө Мэдээллийн төвөөс 5 дахь жилдээ зохион байгуулж байгаа “Барилга орон сууц-2013”  үзэсгэлэн яармаг 9 дүгээр сарын 6-8-ны өдрүүдэд Мишээл экспод зохион байгуулагдах гэж байна.

Үзэсгэлэнд шинэ орон сууц, ипотекийн зээл олгож байга арилжааны банкууд, барилгын материалын үйлдвэрлэгч, импортлогч болон амины орон сууцны чиглэлээр үйл ажиллагаа явуулдаг 120 гаруй аж ахуйн нэгж байгууллагууд оролцох юм.

Энэ удаагийн үзэсгэлэн  нь Монгол улсад барилгын салбар үүсч хөгжсөний түүхт 87 жилийн ойн баярыг тохиолдуулан зохион байгуулагдаж байгаагаараа онцлог юм. Мөн Засгийн газраас барилгын салбарыг дэмжиж орон сууцны эрэлт нийлүүлэлтийг тэгш хангах бодлого барьж байгаатай холбогдуулан иргэд барилгын компаниудыг холбох  гүүр болж байгаагаараа давуу талтай юм.

Мөн үзэсгэлэн яармагийн үеэр хөрөнгө оруулагч, ханган нийлүүлэгчдийн уулзалт, шинэ техник технологийн танилцуулга санал солилцох семинар болно. Түүнчлэн хямдрал, урамшуулал зарласан шинэ орон сууцнуудаас сонголтоо хийж, газар дээр нь банкны хөнгөлттэй зээлэнд хамрагдах боломжийг иргэддээ олгож байгаа аж.

Х.Алтанзагас