Азийн хүүхдийн наадмаас хоёр хүрэл медаль хүртэв

БНХАУ-ын Наньжин хотноо Азийн хүүхдийн хоёрдугаар их наадам наймдугаар сарын 16-нд эхэлсэн.

Азийн 45 орны өсвөрийн тамирчид спортын 16 төрөлд 122 багц медалийн төлөө хурд хүч авьяас чадвараа сорин өрсөлдөж байна.

Монголын баг тамирчид уг наадамд хөнгөн атлетик, сагсан бөмбөг, туялзуур сэлэм, ширээний теннис, талбайн теннис, гандбол, хүндийг өргөлт, буудлага, жүдогийн төрөлд 89 хүний бүрэлдэхүүнтэй оролцож байгаа.

Тэмцээний хоёр дахь өдөр жүдо бөхийн төрөлд эрэгтэйчүүдийн 55кг-д З.Түшигтөр хүрэл медаль хүртсэн бол эмэгтэйчүүдийн 52кг-д Ц.Хулан мөн хүрэл медалийн тавцанд зогслоо.

Азийн хүүхдийн хоёрдугаар их наадам наймдугаар сарын 24-нд өндөрлөх юм.