Нүдэн балай чих нь дүлий Н.Багабанди
Монгол Улсын Ерөнхийлөгч Ц.Элбэгдорж өчигдөр Үндэсний аюулгүй байдлын зөвлөлийн үе үеийн гишүүдтэй уулзаж эдийн засаг, санхүү, хөрөнгө оруулалтын асуудлаар санал солилцлоо. Тэдний яриа гацаанд ороод байгаа Оюутолгой төслийн талаар голлон өрнөсөн нь мэдээж. “Рио Тинто”-ийн удирдлагуудтай зөвшилцөж, Оюутолгой төслийн ажлыг урагшлуулахад ҮАБЗ-ийн гишүүн бүрийн санал чухал. Ялангуяа “Оюутолгой” ХК-ийн ТУЗ-ийн гишүүнээр ажиллаж байгаа Н.Багабандийн байр суурь, хэлэх үг хамгаас чухал байх ёстой. Учир нь тэрбээр тус компанийн ТУЗ-ийн гишүүний хувиар болж буй үйл явдлын талаар ҮАБЗ-ийн үе үеийн гишүүдээс илүү мэдээлэлтэй байгаа. Тиймээс түүний байр суурь, санал нь шийдвэр гаргахад нөлөөтэй юм. Н.Багабанди ч Ерөнхийлөгч байсны хувиар, “Оюутолгой” ХК-ийн ТУЗ-д Монгол Улсыг төлөөлөн сууж байгаа хүний хувиар хөрөнгө оруулагчидтай хэрхэн зөвшилцөх талаар байр сууриа гарцаагүй илэрхийлэх ёстой. Гэтэл тэрбээр одоог хүртэл энэ талаар ганц ч үг ган хийгээгүй байна. Тэрбээр тус компанийн ТУЗ-д суух болсноосоо хойш бүлх залгисан мэт чимээгүй болж, хааяа нэг наадмын үеэр бараагаа харуулах болов.
Монголчууд Оюутолгой төслийн талаар нэгдсэн ойлголтод хүрч, нэг шийдвэр гаргахад тус компанийн ТУЗ-ийн гишүүдийн, ялангуяа Н.Багабандийн хэлэх үг чухал байхад өдий хүртэл чимээгүй сууж байгааг өнгөрсөн хугацаанд олон хүн шүүмжилж байлаа. Мөн ТУЗ-ийн гурван гишүүнийг нөгөө талд ажиллаж байна ч гэж хардсан хүн олон байсан. Үнэхээр Н.Багабанди “Оюутолгой” төслийн талаар чухам ямар байр суурьтай байгааг олон хүн мэдэхийг хүсч байна. Харин тэрбээр оньсого мэт байсан хэвээр л.
http://mongolcomments.mn/index.php?pid=54&sec=view&id=10685
URL:
