БХБЯ-наас орон сууцны үнэтэй холбоотой мэдэгдэл гаргалаа
Засгийн газраас жилийн найман хувийн хүүтэй орон сууцны зээлийн журам өөрчлөлт орж шинэ орон сууцны м.кв-г дээд хэмжээг 2.2 сая, хуучин орон сууцны м.кв-г дээд хэмжээг 1.9 сая төгрөг гэх мэдээлэл цацагдсан. Тэгвэл уг мэдээлэл ташаа мэдээлэл байсан хэмээн Барилга хот байгуулалын яамнаас мэдэгдэл гаргалаа.
Мэдэгдэлд,
“Шинэ бүтээн байгуулалт” дунд хугацааны зорилтот хөтөлбөр, Засгийн газрын 2012-2016 оны үйл ажиллагааны хөтөлбөрийг хэрэгжүүлэх зорилгоор “Иргэдийг орон сууцжуулах талаар авах зарим арга хэмжээний тухай” Засгийн газрын 2013 оны 135 дугаар тогтоолыг Барилга, хот байгуулалтын яам, Монгол банк хамтран хэрэгжүүлж байна.
Иргэдийг орон сууцжуулах, орон сууцны эрэлт, нийлүүлэлтийг дэмжих, санхүүжилтийн тогтвортой тогтолцоог бий болгох зорилгоор барилгын гол нэрийн материалын үнийг тогтворжуулах, дотоодын барилгын материалын үйлдвэрүүдийг дэмжих, дуусаагүй барилгуудыг ашиглалтад оруулах чиглэлээр шат дараатай арга хэмжээг авч хэрэгжүүлснээр зохих үр дүнгээ өгч эхэллээ .
Нөгөө талаар орон сууцны эрэлтийг дэмжих бодлогын хүрээнд Монгол банктай хамтран “Орон сууцны ипотекийн зээлийн ерөнхий журам”-ыг боловсруулж, Монгол Улс анх удаа орон сууцны зээлийн Олон Улсын стандартыг нэвтрүүлээдбайна.
2013 оны 8 дугаар сарын 14-ний байдлаар ипотекийн зээлээс 789,1 тэрбум төгрөгийн зээлийг дахин санхүүжүүлэх хүсэлтийг арилжааны банкуудад ирүүлжээ. Үүнээс банкууд 14812 иргэний хүсэлтийг бүрэн шийдвэрлэж, орон сууцны ипотекийн 419,3 тэрбум төгрөгийн зээлийг дахин санхүүжүүлж, орон сууцны зээлийн хүүг 8 хувьд шилжүүлж, 298,1 тэрбум төгрөгийн орон сууцны ипотекийн зээл шинээр авах хүсэлт ирүүлснээс банкууд 4193 иргэнд 225,3 тэрбум төгрөгийн орон сууцны ипотекийн зээлийг шинээр олгоод байна.
Орон сууцны эрэлт өссөн, хөтөлбөрт хамрагдсан орон сууцнууд хараахан ашиглалтад орж эхлээгүй байгаа хэсэгхэн хугацааг ашиглан үл хөдлөх хөрөнгийн бизнес эрхэлдэг хэсэг бүлэг хүмүүсийн зүгээс хэвлэл мэдээллийн хэрэгслийг ашиглан худал цуурхал тарааж байна.
Тухайлбал, 8%-ийн хүүтэй зээл зогссон, орон сууцны санхүүжилтийн зээлийн эх үүсвэр дууссан, орон сууцны 1 м2 талбайн дээд үнийг тогтоож, хязгаарлалт хийгдэж байгаа гэх мэтээр буруу ташаа мэдээлэл тарааж байгаа нь үндэслэлгүй болохыг Барилга, хот байгуулалтын яамнаас мэдэгдэж байна гэжээ.
URL:
