Төрийн сангийн үйл ажиллагааны журмыг шинэчлэн баталлаа

Засгийн газрын 205-р тогтоолоор батлагдсан “Төрийн сангийн үйл ажиллагааны журам”-д гадаад төлбөр тооцоог банкаар дамжуулан хийх харилцааг зохицуулсан заалт өмнө нь байдаггүй байжээ.

Иймд Улсын төсөвт байгууллагуудын гадаад төлбөр, тооцоог Монголбанкинд байрших Сангийн яамны хөрвүүлгийн дансаар дамжуулснаар гадаад төлбөр тооцоог ажлын 2-3 өдөрт гүйцэтгэж байсан нь ханшийн зөрүү үүсэх, хугацаа алдах зэрэг учир дутагдлыг дагуулж байсан аж.

Олон улсын зээл, тусламжийн хүрээнд хийгдэж байгаа төсөл арга хэмжээнүүд өнөөг хүртэл Төрийн санд төвлөрөөгүй, арилжааны банкуудаар дамжуулан гүйцэтгэгдэж байгаа нь төсвийн хяналтыг сулруулж байгаа тул Олон улсын санхүүжүүлэгч байгууллагуудаас тавьсан хүсэлт, Төсвийн тухай хуулийн заалтуудыг үндэслэн Төрийн сангийн үйл ажиллагааны журмыг шинэчлэн боловсруулжээ. Засгийн газрын өнөөдрийн хуралдаанаар энэ талаар хэлэлцсэн байна.

Энэхүү журмыг шинэчлэн боловсруулснаар гадаад төлбөр тооцоог боловсронгуй, түргэн шуурхай, ханшийн эрсдэл багатай, төсөвт байгууллагын зардлыг бууруулах ажлын хүрээнд хамтран ажиллах саналыг долоон банкинд хүргүүлж, хамгийн бага үнийн санал, цахим үйлчилгээг санал болгож ирүүлсэн банктай туршилтын ажлыг долдугаар сарын 1-ээс эхлүүлсэн байна. Туршилтаар төлбөрийн шат дараалал багассан, гадаад төлбөр өдөртөө багтан төлбөр хүлээн авагчийн дансанд шилжих болсон, үйчилгээний зардал 30 хүртэл хувиар буурсан зэрэг олон эерэг үр дүн гарч эхэлжээ.