Засгийн газрын ээлжит хуралдаан боллоо

Газрын тосны газар 2000 оноос гадаадын өндөр хөгжилтэй улс орнуудад газрын тосны мэргэжилтэй боловсон хүчин бэлтгэх ажлыг эхлүүлж, сургалтын урамшууллын хөрөнгөөр гадаад, дотоодод оюутан залуусыг суралцуулах, сургалтын тэтгэлэг олгох ажлыг холбогдох байгууллагуудтай хамтран зохион байгуулж  эхэлсэн.

Өнөөдрийн байдлаар 101 хүн тус газартай урт хугацааны сургалтын гэрээ байгуулан газрын тос болон түүнтэй холбогдох чиглэлээр гадаад оронд суралцаж байгаа бол 66 хүн сургуулиа төгсөөд ирсэн байна.

Иргэд сургалтын урамшууллын хөрөнгөөр суралцах сонгон шалгаруулалтад шүүмжлэлтэй хандаж байсан учир сонгон шалгаруулах журмыг Засгийн газрын хуралдаанаар шинэчлэн баталлаа.

Журамд зааснаар Сонгон шалгаруулалтыг олон нийтийн мэдээллийн хэрэгсэл болон өдөр тутмын хэвлэл, уул уурхайн, боловсролын асуудал хариуцсан төрийн захиргааны төв байгууллага, газрын тосны асуудал харуцсан төрийн захиргааны байгууллагын цахим хуудсаар сонгон шалгаруулалт болохоос 30 хоногийн өмнө зарлана.

Монгол Улсын их, дээд сургуульд сургалтын урамшууллын хөрөнгөөр суралцах сонгон шалгаруулалтад газрын тос, уул уурхайн чиглэлээр суралцахаар анх элссэн болон 1, 2 дугаар дамжаанд 3.0 ба түүнээс дээш голч дүнтэй суралцаж байгаа суралцагч оролцох эрхтэй.

Харин гадаадын их, дээд сургуулийн баклаврын шатанд суралцах сонгон шалгаруулалтад ерөнхий боловсролын сургуулийг A, B үнэлгээтэй төгссөн болон газрын тос, уул уурхайн чиглэлээр дотоодын их, дээд сургуулийн 1 болон 2 дугаар дамжаанд 3.0 ба түүнээс дээш голчтой суралцаж байгаа суралцагч оролцох боломжтой.

Мөн энэ чиглэлийн мэргэжлээр баклаврын зэрэгтэй, мэргэжлээрээ 2 ба түүнээс дээш жил ажилласан иргэд гадаад болон дотоодын магистрын сургалтад, Харин 5 ба түүнээс дээш жил ажилласан, судалгаа шинжилгээний ажлын туршлагатай иргэд гадаад, дотоодын докторын сургалтад иргэдийн шалгаруулалтад оролцох эрхтэй юм.

Олон улсын эдийн засаг, хамтын ажиллагаа өргөжин тэлж байгаа өнөө үед улсын төсөвт байгууллагуудын гадаад улс орнуудтай хамтран хэрэгжүүлэх төсөл, хөтөлбөрийн санхүүжилтийг хүлээн авах болон дамжуулах, төлбөр гүйцэтгэх тогтолцоонд шинэчлэл хийх шаардлагатай болоод байна.

Засгийн газрын 205-р тогтоолоор батлагдсан “Төрийн сангийн үйл ажиллагааны журам”-д гадаад төлбөр тооцоог банкаар дамжуулан хийх харилцааг зохицуулсан заалт байхгүй байсан.

Иймд Улсын төсөвт байгууллагуудын гадаад төлбөр, тооцоог Монголбанкинд байрших Сангийн яамны хөрвүүлгийн дансаар дамжуулснаар гадаад төлбөр тооцоог ажлын 2-3 өдөрт гүйцэтгэж байсан нь ханшийн зөрүү үүсэх, хугацаа алдах зэрэг учир дутагдлыг дагуулж байлаа.

Олон улсын зээл, тусламжийн хүрээнд хийгдэж байгаа төсөл арга хэмжээнүүд өнөөг хүртэл Төрийн санд төвлөрөөгүй, арилжааны банкуудаар дамжуулан гүйцэтгэгдэж байгаа нь төсвийн хяналтыг сулруулж байгаа тул Олон улсын санхүүжүүлэгч байгууллагуудаас тавьсан хүсэлт, Төсвийн тухай хуулийн заалтуудыг үндэслэн Төрийн сангийн үйл ажиллагааны журмыг шинэчлэн боловсруулжээ.

Энэхүү журмыг шинэчлэн боловсруулснаар гадаад төлбөр тооцоог боловсронгуй, түргэн шуурхай, ханшийн эрсдэл багатай, төсөвт байгууллагын зардлыг бууруулах ажлын хүрээнд хамтран ажиллах саналыг 7 банкинд хүргүүлж, хамгийн бага үнийн санал, цахим үйлчилгээг санал болгож ирүүлсэн банктай туршилтын ажлыг 7 дугаар сарын 1-ээс эхлүүлсэн байна.

Туршилтаар төлбөрийн шат дараалал багассан, гадаад төлбөр өдөртөө багтан төлбөр хүлээн авагчийн дансанд шилжих болсон, үйчилгээний зардал 30 хүртэл хувиар буурсан зэрэг олон эерэг үр дүн гарч эхэлсэн байна.

Одоо хүчин төгөлдөр үйлчилж байгаа “Соёлын өвийг хамгаалах тухай” хуулийн зохицуулалт соёлын өвийг бүрэн хамгаалах шаардлагыг хангаж чадахгүй байгаагаас өвийг үрэгдүүлж, устгасан этгээдэд тооцох хариуцлага, хяналтын тогтолцоо сул, бүрэн төлөвшөөгүй, биет бус өвийг өвлөн уламжлагчийн үнэлэмж доогуур, төрийн дэмжлэг дутмаг байна.

Үүнийг өөрчилж, түүх соёлын дурсгалт зүйлийг хамгаалах эрх зүйн орчинг боловсронгуй болгож, зохион байгуулалтын эрс шинэчлэл хийх хэрэгтэй байгаа учраас Соёлын өвийг хамгаалах тухай хуулийн шинэчилсэн найруулгын төслийг холбогдох хуулиудад нэмэлт, өөрчлөлт оруулах хуулийн төслийн хамт боловсруулжээ. Засгийн газар хуулийн төслийг хэлэлцэн дэмжээд, УИХ-д өргөн мэдүүлэхээр тогтлоо.

Соёлын өвийг хамгаалах тухай хуулийн шинэчилсэн найруулгын төсөл нь 13 бүлэг, 59 зүйлтэй. Соёлын өвийг хамгаалах тухай хуулийн нэр томъёоны хэсгийг шинээр тодорхойлж, найруулга хийсэн, өвийн ангиллаас хамаарч түүнийг хадгалах, хамгаалах нөхцлийг тодорхойлсон зэрэг зарчмын өөрчлөлтийг оруулсан байна.

Хуулиар соёлын өвийг эдийн засгийн эргэлтэд оруулах, үзмэрийн хуулбар, загвараар бэлэг дурсгалын эд зүйл хийх, борлуулах, үйлдвэрлэх ажиллагаанд мерчандайзинг ашиглах боломжийг бүрдүүлж, мерчандайзийн гэрээнд заавал тусгах шаардлага, нөхцлийг тодорхойлох юм гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Монголбанкнаас тогтоосон зохистой харьцааг хангахын тулд Төрийн банкинд 85 тэрбум төгрөгийн нэмэлт хөрөнгө оруулалт шаардлагатай байгааг Засгийн газрын хуралдаанаар хэлэлцээд Төрийн банкны хувь нийлүүлсэн хөрөнгийг 85 тэрбум төгрөгөөр нэмэгдүүлэхийг Сангийн сайд Ч.Улаанд үүрэг болголоо.

Мөн тус банкны бүтэц, зохион байгуулалт, үйл ажиллагааг сайжруулах арга хэмжээ авч ажиллахыг холбогдох хүмүүст даалгалаа.

 Гадаад харилцааны сайд Л.Болдын урилгаар Шинэ Зеланд Улсын Гадаад хэргийн сайд Маррэй Маккаллигийн 2013 оны 8 дугаар сарын 20-ны өдөр Монгол Улсад хийх албан ёсны айлчлалын үеэр монголын талын баримтлах удирдамжийн төслийг хэлэлцээд Ерөнхий сайдаар батлуулахаар тогтлоо.

Чөлөөт бөхийн Ази тивийн аварга, гардан тулааны дэлхийн аварга, боксын өсвөр үе, залуучуудын Ази тивийн аварга, чөлөөт бөхийн эмэгтэйчүүдийн дэлхийн цомын аварга, дугуйн Ази тивийн аварга, хөнгөн ателетикийн Ази тивийн аварга, жюү-жицу бөхийн дэлхийн аварга, даамын их мастер, шатрын сурагчдын дэлхийн аварга,

жүдо бөхийн гран-при, жүдо бөхийн мастерс, Ази тивийн аварга, паратаеквондогийн дэлхийн аварга шалгаруулах тэмцээнд амжилттай оролцож медаль хүртсэн тамирчин, тэдгээрийн дасгалжуулагчдад мөнгөн шагнал олгох асуудлыг хэлэлцээд Засгийн газрын тогтоол гаргахаар боллоо.

“Олон улсын хэмжээнд зохиогддог соёл урлагийн их наадам, уралдаан, үзэсгэлэн, номын яармагт оролцож, онцгой амжилт гаргасан соёлын ажилтан, уран бүтээлчдэд мөнгөн шагнал олгох журам”-ын болзол хангасан таван уран бүтээлч, нэг хамтлагт мөнгөн шагнал олгохоор шийдвэрлэлээ.

 УИХ-ын гишүүн Б.Гарамгайбаатарын санаачлан боловсруулсан Компанийн тухай хууль болон бусад нэмэлт, өөрчлөлт оруулах тухай хуулийн төслийг Засгийн газрын зүгээс зарчмын хувьд дэмжээд зарим саналыг төсөл санаачлагчид уламжлахаар тогтов.

Мэргэжлийн хяналтын байгууллагын дүгнэлт, аж ахуйн нэгжийн хүсэлт болон Үйлдвэр, хөдөө аж ахуйн яамны саналыг үндэслэн Дорноговь аймгийн “Дорнын говь”, Завхан аймгийн “Мөнхөд мандаг”, “Биндэръяа”, “HSM” ХХК-уудын согтууруулах ундаа үйлдвэрлэх тусгай зөвшөөрлийг хүчингүй болголоо.

Түгээмэл тархацтай ашигт малтмалын тухай хуулийн төсөл, Ашигт малтмалын тухай хуульд нэмэлт өөрчлөлт оруулах тухай хуулийн төсөл, Аж ахуйн үйл ажиллагааны тусгай зөвшөөрлийн тухай хуульд нэмэлт өөрчлөлт оруулах тухай хуулийн төсөл, Улсын тэмдэгтийн хураамжийн тухай хуульд нэмэлт өөрчлөлт оруулах тухай хуулийн төслийг хэлэлцээд хуралдаан дээр Засгийн газрын гишүүдээс гаргасан саналыг тусган УИХ-д өргөн мэдүүлэхээр тогтлоо.