Бүх цэргийн наадам өнөөдөр болно

Бүх цэргийн наадмын 2013 оны үндэсний бөхийн барилдаан өнөөдөр буюу долоодугаар сарын 3-нд 15.00 цагаас Монгол бөхийн өргөөнд болно.

Бүх цэргийн наадамд аймаг, цэргийн цолтой болон залуу гэсэн нийт 256 бөх барилддаг.

Энэхүү наадамд цэрэг, цагдаа, зэвсэгт хүчний байгууллагуудын спорт хороодын 256 тооны бөхийг мэдүүлгээр барилдуулна гэж Монголын үндэсний бөхийн холбооноос мэдээллээ.

Барилдааныг Үндэсний их баяр наадмын тухай хууль, Монголын Үндэсний бөхийн барилдааны дүрмийн дагуу бөхчилсөн хэлбэрээр явуулна.

Монголын үндэсний бөхийн холбооноос томилогдсон жаяг дэгийн баг удирдан барилдуулах бөгөөд таваас дээш давж шөвгөрсөн бөхчүүдэд дараах цол, чимэг олгоно. Найм давж түрүүлсэн бөхөд “цэргийн арслан”, долоо давж үзүүрлэсэн бөхөд “цэргийн заан”, зургаа давж дөрөвт үлдсэн бөхөд “цэргийн харцага”, тав давж шөвгөрсөн бөхөд “цэргийн начин” цол олгодог юм.