Ерөнхийлөгчийн сонгуулийн санал хураалт дууслаа

Өнөөдөр 07.00 цагт эхэлсэн Ерөнхийлөгчийн сонгуулийн санал хураалт 22.00 цагт дууслаа.

Санал хураалтын ирц 18.00 цагийн байдлаар улсын хэмжээнд 57,73 хувьтай байсан талаар бид өмнө нь мэдээлж байсан. Харин одоо 22.30 цагт СЕХ-ноос албан ёсны ирцийн мэдээллийг өгнө.

Энэ жил сонгуулийн насны 1.856.190 иргэн сонгогчийн нэрсийн жагсаалтад бүртгэгдсэн.
Аймаг, нийслэлийн 22 сонгуулийн хороо, сум, дүүргийн 339 сонгуулийн хороо, 1896 хэсгийн хороо байгуулагдаж, тэдгээрт төрийн жинхэнэ болон үйлчилгээний нийт 15863 албан хаагч сонгуулийн бэлтгэлийг ханган ажиллаж байгаа юм.

Гадаадад байгаа сонгогчдын санал бүхий битүүмжилсэн зургаан хайрцгийг Сонгуулийн ерөнхий хорооны комиссын гишүүд, ажиглагч, хэвлэл мэдээллийхнийг байлцуулан эхний хайрцгийг 18.00 цагт задлан лацыг авч тооллогын комисст тус бүрт нь хүлээлгэж өгсөн. Одоо 22.00 цагт саналын хуудсыг тоолж эхэлнэ.