НҮБ-ын Ерөнхий ассамблейн дарга Монголд айлчиллаа

НҮБ-ын Ерөнхий Ассамблейн 67 дугаар чуулганы дарга Вук Еремич Монгол Улсад энэ сарын 21-нд айлчиллаа.

УИХ-ын дарга З.Энхболд В.Еремичийг Сүхбаатарын талбайд албан ёсоор угтан авч, Их эзэн Чингис хааны хөшөөнд хамтдаа хүндэтгэл үзүүллээ. УИХ-ын дарга З.Энхболд, В.Еремич нарын хийсэн уулзалтад Монголын талаас УИХ-ын гишүүн, Гадаад харилцааны сайд Л.Болд тэргүүтэй төлөөлөгчид оролцлоо.

Энэ үеэр УИХ-ын дарга З.Энхболд НҮБ-ын Ерөнхий Ассемблейн 67 дугаар чуулганаар манай улсын хэлэлцүүлж батлуулсан “Монгол Улсын цөмийн зэвсэггүй статусын тухай” цөмийн зэвсэгтэй 5 гүрний хамтарсан Тунхаглал болон Монгол Улсын Тунхаглал, мөн Ардчиллын боловсролын асуудлаархи “Хамтын нийгэмлэгийн ололт амжилтууд ба дэлхийн сорилтууд” Тунхаглалын ач холбогдлыг цохон тэмдэглэлээ.

В.Еремич хэлэхдээ НҮБ-ын Ерөнхий Ассамблейн даргын ажлыг хүлээн аваад Монгол Улстай хамтран гаргасан тогтоолууд нь түүхэн ач холбогдолтой бичиг баримтууд болсон нь Монгол Улсын нэр хүнд дэлхийд өсөж,  дэлхий нийт Монгол Улсыг хүлээн зөвшөөрч, хүндлэл үзүүлж буйн илрэл болсон хэмээн онцлоод олон улсын түвшинд олж буй энэ амжилтад танай ардчилсан Ерөнхийлөгчийн тууштай санаачлага, манлайлал чухал нөлөөтэй байсныг онцлов.

Мөн ирэх 9 дүгээр сард эхлэх Ерөнхий Ассамблейн 68 дугаар чуулганы бэлтгэл ажлын талаар болон тус чуулганаар Монгол Улс өөрийн санаачилсан гурван тогтоолын үндэсний хэрэгжилтийг тайлагнаж хэлэлцүүлэх тухай ярилцлаа. Тухайлбал, Монгол Улс 2015 оноос хойшхи хөгжлийн зорилтууд, Тогтвортой хөгжлийн зорилтууд,  Хөгжлийн бэрхшээлтэй иргэдийн хөгжлийг дэмжих тухай асуудлуудын талаархи хэлэлцүүлэгт идэвхтэй оролцохоор төлөвлөж буйг дуулгалаа.

Айлчлалын үеэр В.Еремич Монгол Улсын ЕрөнхийлөгчЦ.Элбэгдоржид бараалхав. Ерөнхийлөгч Ц.Элбэгдорж архины хэрэглээний хяналтын талаарх конвенц батлуулах манай саналыг Дэлхийн эрүүл мэндийн байгууллага болон зарим орон  дэмжиж байгаа тухай мэдээлж, НҮБ-ын харьяанд усны төрөлжсөн бие даасан байгууллага байгуулах, энэ чиглэлээр болон байгаль орчны салбарт улс хоорондын хамтын ажиллагааг өргөжүүлэх, архины буруу хэрэглээний хяналтын конвенц батлуулах Монгол Улсын санал санаачилгыг дэмжихийг В.Еремичээс хүслээ.

Айлчлалын дүнгээр В.Еремич сэтгүүлчдэд ярилцлага өгч, Сүхбаатарын талбайд байгуулсан Динозаврын түр музейд зочлон саатлаа.

Вук Еремич Монголд мөн анх удаа ирж байгаадаа баяртай байгаагаа илэрхийлж, Монгол Улс дэлхийн хариуцлагатай иргэн байж, гишүүн орнуудын дундаас НҮБ-ын үйл ажиллагаанд хамгийн идэвхтэй байр сууринаас оролцож байгаад талархан айлчлалаа өндөрлөөгэж ГХЯ-ны Мэдээлэл, гадаад сурталчилгааны хэлтсээс мэдээллээ.