М.Болдсайхан: Шалгалтын дүнг ирэх сарын 1-нд зарлана
Элсэлтийн ерөнхий шалгалтын дүн хэзээ гарах болон дүнгээ хэрхэн мэдэж болох талаар Боловсролын үнэлгээний төвийн ахлах мэргэжилтэн М.Болдсайханаас тодрууллаа.
-Элсэлтийн шалгалтын дүнг олон нийтэд хэзээ зарлах вэ?
-Шалгалтын дүнг ирэх сарын 1-нд улс орон даяар зарлана. Харин шалгалтын зөв хариуг энэ долоо хоногт багтаан өдөр тутмын сонинуудаар мэдээлнэ. Иргэд энэ хоёрыг хольж ойлгоод байдаг. Өөрөөр хэлбэл, шалгалтын зөв хариу зарлахыг дүн оноо зарлаж байна гэж ойлгодог. Тэгэхээр зөв хариуг нь энэ долоо хоногт, шалгуулагчдын дүнг ирэх сарын 1-нд зарлана гэж ойлгох хэрэгтэй.
-Шалгуулагчид өөрсдийн дүнг тухайн үед хэрхэн мэдэх боломжтой вэ?
-Өөрийн цахим хаяг болон Боловсролын үнэлгээний төвийн www.eec.mn сайтаар дамжуулан мэдэх боломжтой. Хөдөө орон нутгийн шалгуулагчдын хувьд үүрэн телефоны аль ч утсаар дамжуулан 133233 тусгай дугаарт мессеж илгээснээр дүнгээ авч болно.
-Батламж хуудсыг хэзээ тараах вэ?
-Шалгалтын дүнг улс орон даяар зарласны дараа буюу ирэх сарын 1-5-ны өдрүүдэд тараана. Батламж хуудас гэдэг нь тухайн шалгуулагч өөрийн шалгалт өгсөн хичээлээр ямар оноо авсан болон тухайн аймагтаа хэддүгээр байр эзэлснийг тодорхойлсон хуудас юм.
-Батламж хуудсаа хаанаас авах ёстой вэ?
-Энэ жил төгссөн хүүхдүүд өөрийн сургуулиас авна. Харин өмнө нь төгссөн болон хөдөө орон нутгийн шалгуулагчид өөрийн шалгалт өгсөн аймгийн Боловсрол, соёлын газар, Улаанбаатар хотын шалгуулагчид “Чингис хаан” дээд сургуулиас очиж авах ёстой. Батламж хуудсыг тарааж дууссаны дараа их дээд сургуулийн элсэлт эхэлнэ.
-Энэ жилийн элсэлтийн ерөнхий шалгалтын ирц ер нь ямархуу байсан бэ?
-Шалгалтад анхны бүртгэлээр 43815 хүүхэд 183859 хичээлээр шалгалт өгөхөөр бүртгүүлсэн. Шалгалт дууссаны дараа нийт төвүүдээс ирцийн мэдээлэл ирдэг. Улсын хэмжээнд 52 шалгалтын төв ажилласан. Тэднээс ирүүлсэн мэдээгээр 177127 шалгалт болсон байна. Бүртгүүлсэн хүүхдүүдийн 96.3 хувь нь хамрагдсан байна.
ЗУУНЫ МЭДЭЭ
URL:
