Ерөнхийлөгч дугуйгаар аялж байна

Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж яг одоо Дархан-Уул аймгийн цэцэрлэгт хүрээлэнгээр дугуйгаар аялж, залуучуудтай уулзалт хийж байна. Ерөнхийлөгч Ц.Элбэгдорж залуучуудад хандан “Монгол залуу хүн бүр мөрөөдөлтэй байх ёстой. Та бүхний дунд ирээдүйн Ерөнхийлөгч, ирээдүйн Ерөнхий сайд сууж байгаа. Ийм эрх чөлөөг ардчилал олгосон юм. Би спортоор хичээллэх дуртай. Усанд сэлдэг, явган алхах дуртай, хөлбөмбөгт “нугасгүй”. Аймаг бүр хөлбөмбөгийн багтай болсон, удахгүй үндэсний хөлбөмбөгийн лиг “төрнө” гэдэгт би итгэдэг. Аймгуудын дунд хөлбөмбөгийн тэмцээн болоход Дорнод аймгийн баг ялсан. Үндэсний хөлбөмбөгийн баг төрөхөд ойрхон байгаа шүү. Та бүхэнд хандаж хэлэхэд хүн бүр ямарваа нэг зүйлээр бусдаасаа илүү байх ёстой. Үгүй ядахнаа бусдаасаа чи 30 минутын өмнө эрт босч сур. Хүн бүр суралцахаас бүү зайлсхий. Нас явчихлаа гэж өөртөө бүү эргэлз. Би 37 настайдаа дэлхийн шилдэг их сургууль болох АНУ-ын Харвардын их сургуульд элсэн суралцсан. Сурахад нас оройтдоггүй юм. Одоо Харвард төгсөгчдийн холбоог тэргүүлж байна. Монгол Улсын Ерөнхийлөгчийн сонгуульд анх удаа нэр дэвшиж байхдаа би оюутан бүрийг тэтгэлэгтэй болгочих юмсан гэж их хүсдэг байлаа, түүндээ хүрсэн. Эцэг, эхчүүдийн ачаанаас их хөнгөлж байгаа шүү гэдгийг сонсоод дотроо их баярласан. Гэхдээ одоо оюутан залуучууд маань дэлхийн шилдэг их, дээд сургуульд суралцаж, боловсрол эзэмших ёстой. Шилдэг оюутнуудыг би дэлхийн 100 шилдэг их, дээд сургуульд улсын зардлаар сургана гэж боддог. Монгол Улсыг монгол хүн л хөгжүүлнэ. Тиймээс залуу хүн бүр сурахын төлөө зүтгэх ёстой.

Одоо миний зорьж байгаа зүйл бол “Оюутан цэрэг” хөтөлбөрийг хэрэгжүүлэх. Цэргийн алба хаасан хүн бүр найдвартай, хариуцлагатай болдог. Сургууль амарсан хоёроос гурван сарын хугацаанд залуучууд маань цэргийн алба хаачихад хатуужаад их хариуцлагатай болж төлөвшинө. Бас монгол хүн нэг бүр гадаадын 10 хүнтэй эн тэнцүү байх ёстой. Үүний тулд спортын аль ч төрлөөр хичээллэдэг, дэлхийн гурван хэл мэддэг байх ёстой. Ингэж байж дэлхийд монгол хүн ямар чадалтай хүчтэй вэ гэдгээ харуулах болно” гэсэн юм. Залуучууд Монгол Улсын Ерөнхийлөгчийн саналыг дэмжиж, сонгуульд ялах дахин сонголтыг хийх болно гэдгээ амлалаа.

Нэр дэвшигч Ц.Элбэгдорж энэхүү уулзалтаа өндөрлүүлснийхээ дараа тус аймгийн иргэд, сонгогчидтой  уулзалт хийх юм.

Г.ДАРЬ