Өндөр барилгын норм дүрэм хэрэгтэй байна

ХБНГУ-ын Колбекер компанийн удирдлагуудыг Барилга, хот байгуулалтын сайд Ц.Баярсайхан хүлээн авч уулзлаа.

Колбекер компани нь олон улсын болон дотоодын дэд бүтэц, барилгын төслүүдэд төлөвлөлт зөвлөгөө өгөх үйл ажиллагаа явуулдаг.  Барилгын төлөвлөлт, үнэлгээ, түлхүүр хүлээлгэн өгөх нөхцлөөр барилга угсралтын ажил гүйцэтгэдэг  энэ компани  BMW төсөл, Даймлер Крайслерийн үйлдвэрийн барилгыг Германдаа, БНХАУ-д  Siemens,  Bocsh  үйлдвэрийн барилга, АНУ-д Kia төсөл, Унгарт мерседез бензийн үйлдвэрийн барилга байгууламж барьж байсан туршлагатай юм байна. Хамгийн сүүлд гэхэд Сочид болох өвлийн олимпийн барилга байгууламжийн зураг төсөл дээр ажиллажээ.

Олон улсын хэмжээний төсөлд оролцдог Колбекер манай улсад Шунхлай компанийн шинээр баригдаж эхлэх шар айрагны үйлдвэрийн байгууламж дээр мөн ажиллахаар болжээ.

Үйлдвэрийн байгууламж болон өндөр барилгын зураг төсөл, норм дүрмээр мэргэшсэн тус компанийн удирдлагуудтай сайд Ц.Баярсайхан өндөр барилгын норм дүрмийг боловсруулахад хамтарч ажиллах боломжтой гэж хэллээ.

Барилга, хот байгуулалтын яамны хувьд 17 давхараас дээш барилгад зөвшөөрөл олгодог болсон. Сүүлийн үед Улаанбаатар хотод 30 хүртэл давхар байшин барих хөрөнгө оруулагчид нэмэгдэж байна.  Иймд өндөр байшингийн суурь, газар хөдлөлийн эрсдэлийг тооцох чиглэлээр мэргэшсэн компани хэрэгтэй. Ялангуяа норм, стандартыг нэвтрүүлэхэд  та бүхний туршлагаас хуваалцах хүсэлтэй гэв.

Барилга, хот байгуулалтын салбарт аймаг, зарим хотуудын ерөнхий төлөвлөгөөний тендер зарлагдсан.  Бүтээн байгуулалтын ажил олноороо хийгдэж эхэлж байна.  Шинэ нисэх онгоцны буудлыг дагаад Хөшигтийн  хөндийд шинэ суурьшлын төв байгуулагдана.  Улаанбаатарт шинэ орон сууцны хороолол, дэд бүтцийн ажилд 200 тэрбум төгрөг зарцуулах гэж байгаа зэрэг мэдээллийг сайд өгөв.

Колбекер компанийн захирал Матис Колбекер Улаанбаатар хотод баригдаж эхэлсэн өндөр барилгын суурь, ажлын явцыг сайд болон яамны мэргэжилтнүүдтэй очиж үзэхээр боллоо. Цаашдаа хамтарч ажиллахаа илэрхийллээ.