Ардчиллын цэнхэр тойрог Архангай сонголтоо баталгаажуулна

Архангай аймгийн төв талбайд Г.Дэмид жанжны хөшөөнд цэцэг өргөж хүндэтгэл үзүүлсний дараа иргэдийн уулзалт зохион байгуулсан юм. Архангай бол удаа дараагийн сонгуульд Ардчилсан намыг сонгож ардчилалд итгэл үзүүлсэн, ардчилагчид ч тэдний итгэлийг алдаагүй “цэнхэр” тойрог юм.

Энэ удаагийн Монгол Улсын Ерөнхийлөгчийн сонгуульд ч Ардчилсан намаас нэр дэвшигч Ц.Элбэгдоржийг өмнөх 2009 оны адил дахин сонгож ардчилсан сонголтоо бататгана гэдгийг сонгогчид илэрхийлж байв.

Монгол төрийн гурван өндөрлөг болох Монгол Улсын Ерөнхийлөгч, УИХ дахь олонх, Засгийн газар дан Ардчилсан намаас бүрдэж, тулгынгурван чулуу тэгширсэн энэхүү боломжийг ашиглан төрөө тогтвортой байлгаж их бүтээн байгуулалтыг улс даяар саад бартаагүй өрнүүлэх нь чухал гэдгийг уулзалтад оролцогчид хэлж байлаа.

Ардчилсан сонгуулийн буухиагаа залгаж Ардчилсан намд саналаа өгнө гэдгээ залуу сонгогчид илэрхийлж байв. Оюутан залуусын түрүүч зуны амралтаараа нутагтаа иржээ. Тэд оюутны 70 мянган төгрөгийг олгож, дэлхийн шилдэг 100 их сургуульд тэнцэн суралцсан оюутныг төрөөс дэмжих шийдвэр гаргасан Монгол Улсын Ерөнхийлөгчид талархал илэрхийлсэн юм. УИХ-ын гишүүн Б.Болор залуусыг сонгуульдаа идэвхтэй оролцохыг уриалав.

Монгол Улсын Ерөнхийлөгч бол улсынхаа энгээр хардаг, дэлхийн энгээр сэтгэдэг хүн байх ёстой. Монгол Улсын Ерөнхийлөгч Ц.Элбэгдоржийн гадаад нэр хүнд асар өндөр, АНУ-ын Харвардын их сургуулийг төгссөн. Харвард төгсөгчдөөс олон Ерөнхийлөгч төрдөг. Тэднээс хамгийн сүүлд Ерөнхийлөгч болсон нь Харвард төгсөгчдийн холбоог тэргүүлдэг. Ц.Элбэгдорж Ерөнхийлөгч тус сургуулийн төгсөгчдийн холбоог одоо тэргүүлж, АНУ-ын Ерөнхийлөгч Б.Обама нарыг даргалдаг гээд тоочвол түүний гадаад нэр хүнд, нөлөө асар их гэдгийг уулзалтад оролцсон УИХ-ын дэд дарга Р.Гончигдорж хэлж байлаа. Мөн өнгөрсөн оны сүүлээр гадаад зах зээлээс босгосон “Чингис бонд”-ыг Ц.Элбэгдоржийн гадаад нэр хүндээр олж, төмөр зам, дотооддоо үйлдвэрлэх шатахуун, бүтээ байгуулалтад зарцуулахаар болсныг УИХ-ын гишүүн, Эдийн засгийн хөгжлийн сайд Н.Батбаяр тайлбарлаж байв.

Ахмад настнууд нэр дэвшигч Ц.Элбэгдоржид хандан “Дээшээ цойл. Улам дээшээ өгсч цойл” гэсэн ерөөл айлтгалаа. Архангайчууд бол газар нутгийнх нь гуравхан хувь лицензтэй, газар шороондоо хайртай хүмүүс. Мөн түүн шигээ ардчиллыг эрхэмлэдэг гэдгээ илэрхийлцгээв.

Ц.Элбэгдорж Ерөнхийлөгчийн үед нэг ч Засгийн газар огцроогүй. Төрийн тогтвортой байдал гэдэг асар том үзүүлэлт. Ерөнхийлөгчөөр сонгоно гэдэг хэн нэгэнд албан тушаал өгч байга хэрэг биш, харин хэн нэгнээр Ерөнхийлөгчийн ажлыг хийлгэх гэж их ачаа үүрүүлж байгаа учир сонголтоо зөв хийх нь зүйтэй гэж иргэд хэлж байлаа.

Монгол Улсын Ерөнхийлөгч нам бус байдаг. Аль ч намын төлөөлөл бус, “Монгол Улс миний хувьд ганцхан нам минь” гэж үздэг Ц.Элбэгдоржоор дахин дөрвөн жил төр толгойлуулахын давуу талыг сонгогчид ойлгосон гэдгээ бас илэрхийлж байв.

Ойрын үед иргэдэд газар өмчлүлэх асуудлыг шийднэ. Хэзээ ч хуучирдаггүй, алга болдоггүй өмч бол газар. Сумын төвийн иргэд хамгийн их хэмжээтэй буюу 0,5 га газар өмчлөх эрхтэй. Аймгийн төвд 0,35 га, нийслэлд 0,07 га газрыг иргэдэд өмчлүүлнэ. Энэ оноос иргэд төсвийн хөрөнгө зарцуулж сум орноо хөгжүүлэхэд оролцдог болсон. Энэ жил Архангайд 10 тэрбум төгрөг ирж байгаа. Үүнийг Архангайн иргэд өөрсдөө мэдэж нутаг орно хөгжүлэхэд зарцуулна гэдгийг нэр дэвшигч Ц.Элбэгдорж хэлж байлаа.

Архангайнхан ардчилсан сонголтоо бататгаж хийх сонголтоо аль эрт цээжин дотроо хийсэн гэдгээ хэлэн нэр дэвшигчийг үдлээ.

Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж үөнөөдөр дээс хойш Өвөрхангай аймгийн Хархорин суманд ажиллаж байна.Тэрээр өнөө орой Өвөрхангай аймгийн төв Арвайхээрт ажиллах юм.

                                                                        Д.ОЮУН