“МИАТ”-ийн экс удирдлагуудыг шүүх хурал энэ сарын 10-нд болно

Их хэмжээний мөнгө завшсан, угаасан гэх “МИАТ” ТӨХК-ийн хуучин удирдлагууд, тэдний хам­саатнуудад холбогдох хэргийг шүүх хурал  Цагдан хорих 461 дүгээр ангийн шүүх танхимд өчигдөр болох  байсан ч хойшиллоо. Энэ хэрэгт 2006-2011 оны хооронд “МИАТ” ТӨХК-ийн гүйцэтгэх захирлаар ажиллаж байсан Б.Бат-Эрдэнэ, Б.Эрдэнэбилэг, Ц.Ор­хон, дэд за-хир­лаар ажиллаж байсан Ч.Хо­ролсүрэн, түүний дүү “Монголиан эйрлайнс” группын захирал асан Ч.Суурьтогтох, мөн компанийн нягтлан бодогчоор ажиллаж бай­сан Н.Гантөмөр нарыг хол­бог­дуулан цагдан хориод бай­гаа билээ. Шүүгдэгч нарын өм­гөөлөг­чид “Шинэ өмгөөлөгчид хэрэг дээр дахин ажиллаж байгаа” гэх шалтгаанаар шүүх хурлыг 14 хоногоор хойшуулах хүсэлт гаргасан. Өмгөөлөгчдийн хүсэл­тийг шүүгчид хэлэлцэж шүүх хурлыг хойшлуулсан бөгөөд энэ сарын 10-ны 09:00 цагт шүүх хуралдааныг товлосон. “МИАТ” ТӨХК-ийн гүйцэтгэх захирлаар ажиллаж байсан Б.Бат-Эрдэнэ хоригдож байгаа талаар дээр дурьдсан. Тэгвэл түүний биеийн байдал муудсан байна. Тиймээс эрүүл мэндийн шалтгааны улмаас батлан даалтад гарах хүсэлтийг удаа дараа тавьж байсан ч мөрдөн байцаагч, прокурорын зүгээс цаг­дан хорих таслан сэргийлэх ар-га хэмжээг өөрчлөөгүй байсан. Харин хэрэг шүүхэд шилжсэний дараа Баянзүрх дүүргийн шүүхээс түүний эрүүл мэндийн байдлыг харгалзан үзэж батлан даалтад гаргажээ. Бусад холбогдогчдын зүгээс ч өчигдөр болсон  хурлын үеэр шүүх бүрэлдэхүүнд тус тусын өмгөөлөгчөөрөө дамжуулан цагдан хорих арга хэмжээг өөрчлөх хүсэлт тавьж байлаа. Хэрэгт хол­богдогчдын эрүүл мэндийн байдал муудсан, ар гэрийн нөхцөл байдал зэргийг харгалзан үзэхийг шүүх бүрэлдэхүүнээс хүссэн ч хүсэлтийг хүлээж аваагүй юм байна.

Тус хэрэгт 1997-2007 оны хоо­ронд “Голомт” банкны зур­гаа­дугаар салбарын захирлаар ажиллаж байсан Г.Са­ранчимэг нарын долоон хүн хол­богдоод бай­гаа. Ц.Орхоны эхнэр Ү.Цэцэг­маа, Б.Эрдэнэбилэгийн дүү Б.Мандах­баяр нарын хэрэг үйлд­сэнийг нот­лох баримтаар тог­тоогдоогүй хэмээн үзэж про­куророос хэргийг хэрэг­сэхгүй бол­госон юм. Дээрх хүмүүс 2007-2010 онд Дайны эрсдэлийн даатгал нэрээр тухайн үеийн ханшаар 9.3 тэрбум төг­рөгтэй тэн­цэх хэмжээний ам.дол­ларыг “Best Wealth Aviation Insurance Group” компанийн Хонконг, Япон дахь данс руу шил­жүүлж бай­сан нь тогтоогдсон билээ. Тэдний шилжүүлсэн мөн­гөний 4.3 тэрбум төгрөг нь Монгол Улс дахь арилжааны банк руу иргэдийн дансанд орж ирсэн байдаг.

Ж.Баттуул