Эмэгтэй сагсчид түүхэн ялалт байгууллаа

Катарын нийслэл Доха хотод Олон улсын сагсан бөмбөгийн холбооноос зохион байгуулсан “3 эсрэг 3” аварга шалгаруулах анхдугаар тэмцээн амжилттай боллоо. Тэмцээнд Азийн бүсийн 20 орны эрэгтэй, эмэгтэй нийт 25 баг оролцсоноос манай улсын эмэгтэй шигшээ багийн тамирчид мөнгөн медаль хүртэж, түүхэн амжилт тогтоов. Эмэгтэй сагсчид өмнө нь БНХАУ-ын Хайяньд болсон Азийн элсний спортын III их наадамд оролцож байсан туршлагатай юм. Тэднийг Монголын сагсан бөмбөгийн холбооны эмэгтэй шигшээ багийн менежер Д.Энэбиш дасгалжуулжээ. Сагсчид шилдэг дөрвөн багийн шийдвэрлэх тоглолт буюу хагас шигшээд Туркменистаны хүчтэй багийг ялжээ. Улмаар аваргын алтан медалийн төлөө Энэтхэгийн багтай тоглож ялагдсанаар мөнгөн медаль хүртсэн байна.